ក្រុងអាល់នូម៉ែនៈ ក្រុមឃ្លាំមើលសិទ្ធិមនុស្សបានថ្លែងថា ក្រុមជីហាដ និងសម្ព័ន្ធមិត្តក្រុមឧទ្ទាម បានដកចេញពីតំបន់សំខាន់មួយនៃប្រទេស ស៊ីរីភាគពាយព្យ ខណៈកងកម្លាំងរបស់ប្រធានាធិបតី លោក បាសារ អាល់-អាសាដ បានបើកយុទ្ធនាការវាយលុកទ្រង់ទ្រាយធំប្រឆាំងក្រុមជីហាដដែលគ្រប់គ្រងតំបន់មួយនៅក្នុងខេត្តអ៊ីដលីប។
ប្រទេស តួកគី បានព្រមានថា ក្រុងដាម៉ាស «កុំប្រឡែងលេងជាមួយភ្លើងឲ្យសោះ» ក្រោយពីបានឃើញក្រុមសកម្មប្រយុទ្ធរបស់រដ្ឋាភិបាល បានរុលទៅមុខ ហើយស្ទើរតែបានឡោមព័ទ្ធទឹកដីមួយផ្នែកនៃតំបន់ជនបទដ៏ធំ នៅក្នុងនោះ មានប៉ុស្តិ៍ត្រួតពិនិត្យរបស់តួកគីមួយកន្លែងដែរ។
ក្រោយពីសង្គ្រាមស៊ីវិល បានកើតឡើងរយៈពេល ៨ ឆ្នាំ តំបន់នៃខេត្តអ៊ីដលីបនៅតាមព្រំដែនជាមួយប្រទេស តួកគី នោះ គឺជាទីតាំងឈរជើងសំខាន់ចុងក្រោយរបស់ក្រុមប្រឆាំងជាមួយរដ្ឋាភិបាលលោក អាសាដ គាំទ្រដោយរុស្ស៊ី។
ចាប់តាំងពីខែមករា តំបន់ខេត្តអ៊ីដលីបនេះ ត្រូវបានគ្រប់គ្រងដោយក្រុម Hayat Tahrir al-Sham ដែលបានដឹកនាំដោយក្រុមជីហាដមកពីអតីតក្រុមអាល់កៃដានៅស៊ីរី។
តំបន់ដែលមានមនុស្សរស់នៅប្រហែល ៣ លាននាក់នោះ ត្រូវបានគេសន្និដ្ឋានថា នឹងត្រូវបានការពារដោយកិច្ចព្រមព្រៀងតំបន់សន្តិភាព ដែលបានចុះហត្ថលេខាកាលពីខែកញ្ញាដោយក្រុងម៉ូស្គូ និងក្រុមឧទ្ទាមគាំទ្រដោយក្រុងអង់ការ៉ា ប៉ុន្តែកងកម្លាំងរដ្ឋាភិបាល និងរុស្ស៊ីបានកំណត់គោលដៅយកតំបន់នេះ ដើម្បីធ្វើការវាយប្រហារយ៉ាងខ្លាំងក្លា ចាប់តាំងពីខែមេសា ដោយបណ្តាលឲ្យជនស៊ីវិលជាង ៨៨០ នាក់ បាត់បង់ជីវិត។
ហើយក្នុងរយៈពេលប៉ុន្មានសប្តាហ៍ថ្មីៗនេះ កងកម្លាំងរបបស៊ីរី បានរំកិលទៅមុខបន្តិចម្តងទៅកាន់ទីតាំងឈរជើងភាគខាងត្បូងនោះ។
ក្រុមឃ្លាំមើលសិទ្ធិមនុស្សស៊ីរី មានមូលដ្ឋាននៅអង់គ្លេសបានថ្លែងថា ក្នុងរយៈពេលប៉ុន្មានម៉ោងថ្មីៗនេះ កាលពីថ្ងៃអង្គារ ក្រុមសកម្មប្រយុទ្ធប្រឆាំងលោក អាសាដ បានដកថយចេញពីក្រុង Khan-Sheikhun និងទីជនបទឆ្ពោះទៅទីតាំងឈរជើងរបស់ខ្លួននៅភាគខាងត្បូងវិញ។
ប្រមុខឃ្លាំមើលសិទ្ធិមនុស្សលោក រ៉ាមី អាប់ឌែល រ៉ាហ៍ម៉ាន់ បានថ្លែងប្រាប់ AFP ថា ការដកថយនោះ គឺមានបំណងដកចេញពីចំណុចត្រួតពិនិត្យរបស់តួកគីមួយកន្លែង នៅជិតក្រុងម៉ូរិក និងនៅជុំវិញភូមិដែលត្រូវបានឡោមព័ទ្ធដោយកងកម្លាំងរដ្ឋាភិបាលស៊ីរី។
លោកបានថ្លែងថា ផ្លូវទាំងអស់នៅក្នុងតំបន់នោះត្រូវបានគ្រប់គ្រងដោយកងកម្លាំងរបស់រដ្ឋាភិបាល នៅក្នុងអំឡុងពេលប្រយុទ្ធគ្នា។
ក្រុមឃ្លាំមើលសិទ្ធិមនុស្សបានថ្លែងថា កាលពីថ្ងៃអង្គារ ជនស៊ីវិល ១២ នាក់ នៅក្នុងនោះមានក្មេង ៣ នាក់ទៀតបានស្លាប់ នៅក្នុងការវាយប្រហារគ្នានៅតាមកន្លែងខ្លះនៃខេត្តអ៊ីដលីបភាគអាគ្នេយ៍ ចំណែកមនុស្ស ៩ នាក់ផ្សេងទៀតបានស្លាប់ ក្នុងការវាយប្រហារផ្លួវអាកាសរបស់រុស្ស៊ី៕ AFP/SK