ក្រុងដាម៉ាស៖ ទីភ្នាក់ងារសារព័ត៌មានរដ្ឋសាណា បានរាយការណ៍កាលពីថ្ងៃចន្ទថា កងកម្លាំងអាមេរិកនៅប្រទេស ស៊ីរី បានដឹកជញ្ជូនស្ត្រីក្រុមរដ្ឋអ៊ិស្លាមជាង ១ ៥០០ នាក់ ចេញពីប្រទេស ស៊ីរី ទៅកាន់ទឹកដីប្រទេស អ៊ីរ៉ាក់ ចាប់តាំងពីប្រទេស តួកគី បានបើកការវាយប្រហារទ្រង់ទ្រាយធំនៅស៊ីរីភាគខាងជើង កាលពីថ្ងៃទី ៩ ខែតុលា។
ទីភ្នាក់ងារសាណាបានថ្លែងថា នៅពេលកងកម្លាំងអាមេរិកកំពុងដកចេញពីប្រទេស ស៊ីរីភាគខាងជើង ជាបន្តបន្ទាប់ដោយសារប្រទេស តួកគី បានវាយប្រហារទៅលើក្រុមយុទ្ធជនឃើដ ហើយរហូតមកទល់ពេលនេះ កងកម្លាំងអាមេរិកបាននាំយកស្ត្រីក្រុមរដ្ឋអ៊ិស្លាមជាង ១ ៥០០ នាក់ ចេញពីជំរំអាល់ហ៊ូល នៅខេត្តហាសាកាហ៍ភាគឦសានទៅកាន់ប្រទេស អ៊ីរ៉ាក់។
ជំរំអាល់-ហ៊ូល បានបង្កើតជាជម្រកមួយសម្រាប់ដាក់មនុស្សរាប់ម៉ឺននាក់ នៅក្នុងនោះមានក្រុមស្ត្រី និងយុទ្ធជនសកម្មប្រយុទ្ធរដ្ឋអ៊ិស្លាមជាច្រើន ដែលកាលពីពេលកន្លងទៅកំពុងរត់ភៀសខ្លួនទៅកាន់តំបន់គ្រប់គ្រងដោយក្រុមរដ្ឋអ៊ិស្លាម នៅប្រទេស ស៊ីរីភាគខាងកើត។
ជំរំនោះត្រូវបានគ្រប់គ្រងដោយកងកម្លាំងប្រជាធិបតេយ្យស៊ីរីដឹកនាំដោយក្រុមឃើដ ដែលបានវាយប្រហារយ៉ាងខ្លាំងក្លា ជាមួយក្រុមជីហាដនៅស៊ីរីភាគខាងកើត ដោយមានការគាំទ្ររបស់ក្រុមចម្រុះដឹកនាំដោយអាមេរិក។
ទោះបីជាយ៉ាងណាក៏ដោយ ចាប់តាំងពីតួកគីបានធ្វើយុទ្ធនាការគំរាមកំហែងយូរមកហើយប្រឆាំងកងកម្លាំងឃើដ ដែលត្រូវបានក្រុងអង់ការ៉ាចាត់ទុកថា ជាក្រុមភេរវករ និងក្រុមបំបែកខ្លួន US បានចាប់ផ្តើម បោះបង់តួនាទីខ្លួន និងដកកម្លាំងទៅអ៊ីរ៉ាក់៕ Xinhua/SK