.jpg)
ក្មេងៗមើលឥន្ទធនូនៅពេលថ្ងៃលិចនៅតំបន់ហ្គាហ្សាកាលពីថ្ងៃទី ១០ ខែកុម្ភៈ។ AFP
ក្រុងហ្ស៊េរុយសាឡិម៖ កងទ័ពបាននិយាយថា កងម្លាំងអ៊ីស្រាអែលបានធ្វើការវាយប្រហារផ្លូវអាកាសទៅលើទីតាំងឈរជើងជាច្រើនរបស់ក្រុមហាម៉ាស កាលពីព្រឹកថ្ងៃចន្ទ ក្រោយពីក្រុមជនសកម្មប្រយុទ្ធនៅដែនដីប៉ាឡេស្ទីនបានបាញ់រ៉ុក្កែត ១ គ្រាប់ ទៅលើរដ្ឋជ្វីហ្វ។
សេចក្តីថ្លែងការណ៍មួយចេញពីកងទ័ពបានឲ្យដឹងថា៖ «យន្តហោះចម្បាំងជាច្រើនគ្រឿង បានយកទីតាំងភេរវកម្មជាច្រើនកន្លែងរបស់ក្រុមហាម៉ាសនៅតំបន់ហ្គាហ្សាភាគខាងត្បូងជាគោលដៅដោយបានបញ្ជាក់ថា កន្លែងហឹ្វកហាត់មួយរបស់ក្រុមហាម៉ាស និងហេដ្ឋារចនាសម្ព័ន្ធយោធាក៏ត្រូវបានបញ្ចូលនៅក្នុងការវាយប្រហារផ្លូវអាកាសនោះដែរ»។
មិនមានរបាយការណ៍អំពីអ្នកស្លាប់ និងរបួស ឬក៏ការខូចខាតពីតំបន់ហ្គាហ្សាទេ។
ការយប់ថ្ងៃអាទិត្យ រ៉ុក្កែតមួយគ្រាប់ត្រូវបានគេបាញ់ចេញពីតំបន់ហ្គាហ្សាទៅលើអ៊ីស្រាអែលភាគខាងត្បូង ដោយបាននាំឲ្យមានសំឡេងស៊ីរ៉ែនវាយប្រហារផ្លូវអាកាសរោទិ៍ឡើង និងបានធ្វើឲ្យមនុស្សរាប់ពាន់ភ័យខ្លាចទៅរកជម្រកការពារពីគ្រាប់ផ្លោង។
អ្នកនាំពាក្យនៃក្រុមប្រឹក្សានៅក្នុងតំបន់នៃតំបន់ហ្សាអារហាណេហ្គេវនៅភាគពាយព្យនៃតំបន់ហ្គាហ្សាបាននិយាយថា គ្រាប់រ៉ុក្កែតនោះបានធ្លាក់ចំវាលលម្ហមួយយ៉ាងច្បាស់ក្រឡែត។
ការវាយប្រហាររបស់ប៉ាឡេស្ទីនបានកើនឡើងចាប់តាំងពីថ្ងៃទី ២៨ ខែមករា មក នៅពេលលោកប្រធានាធិបតី ដូណាល់ ត្រាំ បានបង្ហាញទស្សនរបស់លោកដោះស្រាយជម្លោះអ៊ីស្រាអែល-ប៉ាឡេស្ទីនជាផែនការមួយ ដែលត្រូវបដិសេធយ៉ាងដាច់ខាត ដោយក្រុមមេដឹកនាំប៉ាឡេស្ទីន ទាំងនៅក្នុងតំបន់វ៉េសប៊ែង និងហ្គាហ្សា៕ AFP/PSA
