ក្រុងខារទុំៈ មនុស្ស ៧ នាក់ បានស្លាប់កាលពីថ្ងៃអាទិត្យ ខណៈក្រុមអ្នកតវ៉ាស៊ូដង់រាប់លាននាក់ បានឡើងទៅតាមដងផ្លូវ ដើម្បីទាមទារឲ្យជនស៊ីវិលគ្រប់គ្រងអំណាចជំនួសវិញ ជាការប្រមូលផ្តុំទ្រង់ទ្រាយធំលើកទី១ ចាប់តាំងពីមានការបង្ក្រាបដោយបង្ហូរឈាមទៅលើក្រុមបាតុកររយក៏ជាការបង្ហាញអំណាចនៅតាមដងផ្លូវ ទោះបីជាមានការដាក់ពង្រាយកងកម្លាំងយ៉ាងច្រើនក្រាស់ក្រែលដោយក្រុមឧត្តមសេនីយ៍យោធាក្តី។
ក្បួនបាតុកម្ម «មានបុរសរាប់លាននាក់ចូលរួម» ត្រូវបានគេមើលឃើញថា ជាការធ្វើតេស្តសម្រាប់ក្រុមអ្នករៀបចំការតវ៉ាទាំងនោះ ក្រោយពីការទាមទារឲ្យផ្នែកស៊ីវិលគ្រប់គ្រងអំណាចជំនួសវិញត្រូវរងការប៉ះពាល់ដោយការវាយប្រហារកាលពីថ្ងៃទី ៣ ខែ មិថុនា ទៅលើក្រុមអ្នកតវ៉ានៅក្រុងខារទុំ និងមានផ្តាច់អ៊ីនធើណិតជាបន្តបន្ទាប់ ដែលបានទប់ស្កាត់សមត្ថភាពរបស់ពួកគេមិនឲ្យប្រមូលផ្តុំគ្នា។
បាតុកររាប់សិបនាក់ បានស្លាប់ និងរាប់រយនាក់ផ្សេងទៀតរងរបួស នៅពេលកងកម្លាំងប្រដាប់អាវុធក្នុងឯកសណ្ឋានយោធា បានវាយប្រហារទៅលើក្រុមអ្នកតវ៉ាកាលពីថ្ងៃទី ៣ ខែមិថុនា នៅខាងក្រៅទីបញ្ជាការយោធា ដោយបានបាញ់ និងវាយដំលើអ្នកតវ៉ា ដែលបានប្រមូលផ្តុំគ្នានៅទីនោះចាប់តាំងពីថ្ងៃទី ៦ ខែ មេសា មក។
អ្នកឆ្លើយឆ្លងព័ត៌មាន AFP ម្នាក់បានរាយការណ៍ថា កាលពីថ្ងៃអាទិត្យ ប៉ូលិសបានបាញ់ឧស្ម័នបង្ហូរទឹកភ្នែកទៅលើក្រុមអ្នកតវ៉ា ដែលបានដង្ហែក្បួនទៅកាន់វិមានប្រធានាធិបតី ក្រោយពីក្រុមអ្នករៀបចំការតវ៉ា បានអំពាវនាវឲ្យមានការហែក្បួនទៅកាន់អគារការិយាល័យរបស់ក្រុមប្រឹក្សាយោធា ដែលកំពុងគ្រប់គ្រងអំណាចប្រទេសនេះ ។
សមាគមវិជ្ជាជីវៈស៊ូដង់ អំពាវនាវឲ្យប្រជាជននៅរដ្ឋធានីនេះ ធ្វើដំណើរទៅវិមានសាធារណរដ្ឋ៕ AFP/SK