ក្រុងស្រ៊ីណាហ្គារ៖ ប្រភពមន្ត្រីរដ្ឋាភិបាលជាន់ខ្ពស់បានថ្លែងប្រាប់ AFP ថា តំបន់កាស្មៀរបានមើលឃើញមានការតវ៉ាជិត ២០ ដង ក្នុងមួយថ្ងៃប្រឆាំងនឹងការគ្រប់គ្រងរបស់ឥណ្ឌារយៈពេល ៦ សប្តាហ៍ចុងក្រោយនេះ ថ្វីបើមានការរឹតបន្តឹងសន្តិសុខ ដើម្បីបង្ក្រាបភាពចលាចលក្តី។
ភាពតានតឹងនៅតែខ្ពស់នៅក្នុងតំបន់ហិមាល័យ ដែលមានជម្លោះក្រោយពីការសម្រេចចិត្តដ៏ចម្រូងចម្រាសរបស់ក្រុងញូវដែលីកាលពីខែមុន ដើម្បីដកឋានៈពាក់កណ្តាលស្វយ័តមានអាយុកាលជាច្រើនទសវត្សរ៍ពីដែនដីនេះ។
ប្រភពនោះបានប្រាប់ AFP កាលពីល្ងាចថ្ងៃសៅរ៍ថា ថ្វីបើមានបម្រាមគោចរការរឹតបន្តឹងលើការធ្វើដំណើរ និងការកាត់ផ្តាច់សេវាទូរស័ព្ទ និងអ៊នធឺណិតការតវ៉ាជាសាធារណៈប្រឆាំងនឹងឥណ្ឌា ភាគច្រើននៅក្នុងក្រុងស្រ៊ីណាហ្គារ មានជាប្រចាំ។
ប្រភពដដែល បាននិយាយថា សរុបទាំងអស់មានការតវ៉ា ៧២២ ដង ចាប់តាំងពីថ្ងៃទី ៥ ខែ សីហា ដោយស្រុក Baramulla នៅភាគឦសាន និងស្រុក Pulwama នៅភាគខាងត្បូង គឺជាកន្លែងក្តៅបំផុតបន្ទាប់ពីក្រុងស្រ៊ីណាហ្គារ។
យោងតាមប្រភពនោះបានឲ្យដឹងថា ចាប់តាំងពីថ្ងៃនោះមក ជនស៊ីវិលជិត ២០០ នាក់ និងកម្លាំងសន្តិសុខ ៤១៥ នាក់ បានរងរបួស៕ AFP/PSA