.jpg)
អ្នកស្រុក ដើរនៅក្នុងចំណោមបំណែកបែកបាក់បណ្តាលមកពីការវាយប្រហារ។ AFP
ក្រុងបេរូតៈ ក្រុមឃ្លាំមើលសិទ្ធិមនុស្ស បាននិយាយថា ការវាយប្រហាររបស់ក្រុមជីហាដ ២ ក្រុម បានបណ្តាលឲ្យយុទ្ធជនគាំទ្ររបបស៊ីរីយ៉ាងតិច ២២ នាក់ ស្លាប់ នៅខេត្តអាឡិបប៉ូភាគខាងជើង កាលពីព្រឹកថ្ងៃសៅរ៍។
ក្រុមឃ្លាំមើលសិទ្ធិមនុស្ស ស៊ីរីមានមូលដ្ឋាននៅអង់គ្លេសបាននិយាយថា មនុស្ស ៣០ នាក់ផ្សេងទៀតបានរងរបួស នៅក្នុងការវាយប្រហារដោយអតីតសាខាក្រុមអាល់កៃដានៅស៊ីរី គឺក្រុម Hayat Tahrir al-Sham (HTS) និង ក្រុម Hurras al-Deen ជាសម្ព័ន្ធមិត្តរបស់ខ្លួន ដែលនៅមានទំនាក់ទំនងជាមួយបណ្តាញក្រុមជីហាដនៅទូទាំងសកលលោកនោះ។
ប្រមុខឃ្លាំមើលសិទ្ធិមនុស្ស លោក Rami Abdel Rahman បានថ្លែងថា ការប្រយុទ្ធគ្នានៅតាមជនបទនៃខេត្តអាឡិបប៉ូភាគខាងត្បូង និងនិរតីនោះ បានបើកការវាយប្រហាររយៈពេលយ៉ាងខ្លី ក្រោយពីពាក់កណ្តាលអាធ្រាត្រ ហើយបានបង្កឲ្យមានការប៉ះទង្គិចគ្នាជាច្រើនលើក ដែលបានបន្តរហូតដល់ព្រឹកថ្ងៃអាទិត្យ។
លោក Rami Abdel Rahman បានថ្លែងថា ការប្រយុទ្ធគ្នានោះ បានស្ងប់ស្ងាត់ទៅវិញ ក្រោយពីយន្តហោះចម្បាំងរុស្ស៊ីបានវាយប្រហារទៅលើ ទីតាំងក្រុមជីហាដជាច្រើនកន្លែងនៅក្នុងតំបន់នោះ ដោយបង្ខំឲ្យក្រុមសកម្មប្រយុទ្ធទាំងនោះដកថយ។
លោក Rami Abdel Rahman បានថ្លែងថា ក្រុមជីហាដ ៨ នាក់ បានស្លាប់នៅក្នុងការប្រយុទ្ធគ្នានោះ។
ក្រុមឃ្លាំមើលសិទ្ធិមនុស្សបាននិយាយទៀតថា យន្តហោះចម្បាំងរុស្ស៊ី បានបើកការវាយប្រហារនៅក្បែរខាងខេត្តហាម៉ាកាលពីថ្ងៃសៅរ៍ ដោយបណ្តាលឲ្យក្រុមជនស៊ីវិល ៥ នាក់ស្លាប់។
កាលពីថ្ងៃសុក្រ ការវាយប្រហារផ្លូវអាកាសរបស់រុស្ស៊ី បានបណ្តាលឲ្យក្រុមជនស៊ីវិល ១០ នាក់ស្លាប់ នៅក្នុងខេត្តអ៊ីដលីប ជាទីតាំងគ្រប់គ្រងដោយក្រុមជីហាដ៕ AFP/SK
