ក្រុងកាន់ដាហារ: ក្រុមមន្រ្តីបាននិយាយថា គ្រាប់បែកមួយគ្រាប់ដែលត្រូវបានដាក់បង្កៃនៅក្រោមសាឡុងមួយ បានបណ្តាលឲ្យពលរដ្ឋអាហ្វហ្គានីស្ថាន ៤ នាក់ស្លាប់នៅក្នុងនោះបេក្ខជនឈរឈ្មោះបោះឆ្នោតម្នាក់ កាលពីថ្ងៃពុធ ខណ:អំពើហិង្សាបណ្តាលឲ្យមនុស្សស្លាប់ កើនឡើងនៅមុនការបោះឆ្នោតសភា នៅថ្ងៃទី ២០ ខែតុលាខាងមុខនេះ។
ក្រុមតាលីបង់ បានចេញមកអះអាងទទួលខុសត្រូវភ្លាមៗចំពោះការវាយប្រហារនេះ ដែលធ្វើឲ្យចំនួនបេក្ខជនយ៉ាងតិច១០នាក់ស្លាប់នៅក្នុងអំឡុងពេលរដូវយុទ្ធនាការឃោសនាបោះឆ្នោត។
លោក OmarZhwak ជាអ្នកនាំពាក្យអភិបាលខេត្ត បានប្រាប់ AFP ថា លោក Abdul Jabar Qahraman កំពុងជួបជាមួយក្រុមអ្នកគាំទ្រនៅក្នុងការិយាល័យយុទ្ធនាការរបស់លោកនៅភាគខាងត្បូងខេត្ត Helmand ជាបន្ទាយរឹងមាំរបស់ក្រុម តាលីបង់ នៅពេលដែលមានគ្រាប់បែកមួយបង្កប់នៅពីក្រោមសាឡុង បានផ្ទុះឡើងនោះ។
លោក Wais Ahmad Barmak រដ្ឋមន្រ្តីក្រសួងមហាផ្ទៃ បានថ្លែងប្រាប់ក្រុមអ្នកកាសែតថា Qahraman គឺស្ថិតនៅក្នុងចំណោមមនុស្ស៤នាក់ បានស្លាប់ដោយសារផ្ទុះគ្រាប់បែកនេះ នៅក្នុងរដ្ឋធានី LashkarGah។
លោកបានបន្ថែមទៀតថា មនុស្ស៧នាក់ផ្សេងទៀត ត្រូវបានរងរបួស ហើយជនសង្ស័យ៣នាក់ទៀត ត្រូវបានចាប់ខ្លួន៕ AFP/SK