ក្រុងបេរូតៈ ក្រុមឃ្លាំមើលសិទ្ធិមនុស្សបានថ្លែងថា កាលពីថ្ងៃពុធ ការវាយប្រហាររបស់របបស៊ីរី បាន បណ្តាលឲ្យជនស៊ីវិល ១៧ នាក់ និងក្រុមយុទ្ធជនសកម្មប្រយុទ្ធ ១១ នាក់ស្លាប់ នៅតំបន់គ្រប់គ្រងដោយក្រុមជីហាដនៅស៊ីរីភាគពាយព្យ ជាអំពើហិង្សាថ្មីបំផុត បានធ្វើឲ្យកក្រើកនៅតំបន់ដែលមានប្រជាជន ៣ លាននាក់រស់នៅទីនោះ។
ក្រុមឃ្លាំមើលសិទ្ធិមនុស្សស៊ីរី បានថ្លែងថា ជនស៊ីវិល ១២ នាក់ បានស្លាប់ដោយសារការវាយប្រហារផ្លូវអាកាសរបស់របបស៊ីរី ទៅលើភូមិមួយនៅតំបន់ Jabal al-Zawiya នៃខេត្តអ៊ីដលីបភាគអាគ្នេយ៍។
យោងតាមរូបភាពរបស់កាសែត AFP បានឲ្យដឹងថា ការវាយប្រហារនោះ បានបំផ្លាញហាងលក់ទំនិញ និងបានកម្ទេចរាងកាយមនុស្សអស់ជាច្រើនបំណែក ដែលគេបានរកឃើញបំណែករាងកាយនោះនៅឆ្ងាយពីកន្លែងវាយប្រហារជាងរាប់រយម៉ែត្រ។
ក្រុមជួយសង្គ្រោះ ត្រូវបានគេមើលឃើញថា កំពុងទាញយកសាកសពទាំងនោះចេញពីខាងក្រោមគំនរបាក់បែក។
ក្រុមឃ្លាំមើលសិទ្ធិមនុស្សមានមូលដ្ឋាននៅអង់គ្លេស បានថ្លែងថា ជនស៊ីវិល ៤ នាក់ផ្សេងទៀត បានស្លាប់នៅក្នុងការវាយប្រហារផ្លូវអាកាសនៅជិតទីក្រុង និងភូមិជាច្រើននៅក្នុងខេត្តអ៊ីដលីបភាគខាងត្បូង ចំណែកឯជនស៊ីវិលម្នាក់ទៀតបានស្លាប់នៅក្នុងការវាយប្រហារផ្លូវអាកាសជាច្រើនលើកនៅទីក្រុងនៃខេត្តអ៊ីដលីប។
ក្រុមឃ្លាំមើលសិទ្ធិមនុស្ស បានរាយការណ៍ឲ្យដឹងថា នៅក្បែរខេត្តហាម៉ាភាគខាងជើង ការវាយប្រហារដោយគ្រាប់រ៉ុក្កែតរបស់របបស៊ីរី បានសម្លាប់ក្រុមជីហាដ ១១ នាក់ ១ ថ្ងៃ ក្រោយពីមានការប៉ះទង្គិចយ៉ាងគ្នាខ្លាំងក្លានៅតំបន់នោះ បានបណ្តាលឲ្យក្រុមយុទ្ធជនសកម្មប្រយុទ្ធយ៉ាងតិច ៥៥ នាក់ ស្លាប់ នៅក្នុងនោះមានយុទ្ធជនរបបស៊ីរី ១៤ នាក់ផងដែរ។
អំពើហិង្សាចុងក្រោយបានកើតឡើង ក្រោយពីប្រមុខអង្គការសហប្រជាជាតិលោក Antonio Guterresកាលពីថ្ងៃអង្គារបានអំពាវនាវឲ្យរុស្ស៊ីនិងតួកគី «បន្ធូរបន្ថយស្ថានការណ៍» នៅក្នុងតំបន់ខេត្តអ៊ីដលីបនោះ។
លោក Antonio Guterresបានថ្លែងប្រាប់ក្រុមអ្នកសារព័ត៌មានថា៖ «ខ្ញុំមានការព្រួយបារម្ភខ្លាំងអំពីការវាយប្រហារកាន់តែខ្លាំងឡើងនៅខេត្តអ៊ីដលីប» ដោយបានបន្ថែមថា «ក្រុមជនស៊ីវិលកំពុងតែខាតបង់យ៉ាងធ្ងន់ធ្ងរពីការវាយប្រហារ»៕ AFP/SK