ក្រុងទ្រីប៉ូលីៈ មន្ត្រីប្រចាំតំបន់ម្នាក់ និងរដ្ឋាភិបាលទទួលស្គាល់ដោយអង្គការសហប្រជាជាតិបានថ្លែងថា មនុស្សយ៉ាងតិច ៤២ នាក់បានស្លាប់ និងរាប់សិបនាក់ផ្សេងទៀតបានរងរបួស នៅក្នុងការវាយប្រហារផ្លូវអាកាសមួយ ដោយបានយកសាលប្រជុំសាលាក្រុងមួយកន្លែងជាគោលដៅវាយប្រហារនៅលីប៊ីភាគខាងត្បូង និងបានចោទប្រកាន់កងកម្លាំងយោធារបស់បុរសខ្លាំងលោក Khalifa-Haftar ថា ជាអ្នកវាយប្រហារ។
រដ្ឋាភិបាលបង្រួបបង្រួមជាតិ (GNA) បានថ្លែងថា ការវាយប្រហារកាលពីថ្ងៃអាទិត្យបានយកសង្កាត់លំនៅឋាន Qalaa នៅក្នុងក្រុង Murzuq ជា គោលដៅរបស់ពួកគេ។
មន្ត្រីក្រុមប្រឹក្សាក្រុង លោក Ibrahim Omar បានប្រាប់ AFP ថា៖ «ការវាយប្រហារផ្លូវអាកាសនោះ បានបណ្តាលឲ្យមនុស្ស ៤២ នាក់ស្លាប់ និងជាង ៦០ នាក់ ផ្សេងទៀតរងរបួស ហើយ ៣០ នាក់ ក្នុងចំណោមពួកគេនេះ ស្ថិតនៅក្នុងស្ថានភាពយ៉ាងធ្ងន់ធ្ងរ»។
លោកបានថ្លែងថា អគាររដ្ឋាភិបាលមួយកន្លែងដែលមានក្រុមមន្ត្រីក្នុងតំបន់ជាង ២០០ នាក់ ធ្វើការនោះ បានជួបជុំគ្នា «ដើម្បីផ្សះផ្សាលើការខ្វែងគំនិតគ្នានៅក្នុងសង្គម» ដែលត្រូវកំណត់គោលដៅ ៣ លើករួចមកហើយ។
លោកបានថ្លែងថា៖ «យើងមិនត្រូវការឲ្យពួកគេមានអាវុធនោះទេ ហើយលោក Haftar បានវាយប្រហារទៅលើក្រុមជនស៊ីវិលគ្មានអាវុធនៅក្នុងដៃ» ដោយបានអំពាវនាវឲ្យមានជំនួយមនុស្សធម៌ ចាប់តាំងពីមន្ទីរពេទ្យប្រចាំតំបន់ មិនអាចទទួលយកចំនួនអ្នកស្លាប់ និងអ្នករងរបួសបានច្រើននោះទេ។
រដ្ឋាភិបាល GNA បានថ្កោលទោសអំពីការវាយប្រហារនោះនៅលើហ្វេសប៊ុក៕ AFP/SK