ក្រុងឌូបៃៈ ក្រុមមន្ត្រីយោធាគាំទ្ររដ្ឋាភិបាល បានថ្លែងកាលពីថ្ងៃអាទិត្យថា ក្រុមចម្រុះយោធាដឹកនាំ ដោយ អារ៉ាប៊ី សាអ៊ូឌីត បានបន្តវាយប្រហារផ្លូវអាកាសប្រឆាំងបណ្តាញផ្គត់ផ្គង់របស់ក្រុមឧទ្ទាមនៅជុំវិញក្រុងហ៊ូដេដារយៈពេល២ថ្ងៃ ក្រោយពីប្រេសិតពិសេសអង្គការសហប្រជាជាតិម្នាក់ បានធ្វើទស្សកិច្ចក្រុងកំពង់ផែហ៊ូដេដា។
ក្រុមមន្ត្រីយោធា និង គ្រូពេទ្យ នៅក្នុងមន្ទីរពេទ្យ២កន្លែងខុសគ្នា បាននិយាយថា ការវាយប្រហារទាំងនោះ បានកើតឡើង ខណៈការបើកវាយប្រហារជាច្រើននៅជាយក្រុងភាគខាងកើត និងភាគខាងត្បូងក្រុងគ្រប់គ្រងដោយក្រុមឧទ្ទាម បានបណ្តាលឲ្យក្រុមអ្នកបះបោរ ២៦នាក់ស្លាប់ នៅក្នុងរយៈពេល២៤ម៉ោង។
ក្រុមមន្ត្រីទាំងនេះ បានប្រាប់ AFP ថា ក្រុមយុទ្ធជនគាំទ្ររដ្ឋាភិបាល ៥ នាក់ ត្រូវបានសម្លាប់នៅក្នុងការប៉ះទង្គិចគា្ន ជាមួយក្រុមឧទ្ទាមដែលជាសម្ព័ន្ធមិត្តជាមួយ អ៊ីរ៉ង់។
ពួកគេ បាននិយាយថា ការវាយប្រហារផ្លូវអាកាស បានយកក្បួនរថយន្តរបស់ក្រុមឧទ្ទាមនៅផ្លូវចូលទៅកាន់ក្រុងហ៊ូដេដាភាគជើង និងខាងត្បូង ជាគោលដៅ។
អំពើហិង្សា បានបន្តកើតឡើង ក្រោយពីប្រេសិតពិសេសអង្គការសហប្រជាជាតិ លោក MartinGriffiths បានធ្វើទស្សនកិច្ចទៅកាន់ក្រុងហ៊ូដេដា កាលពីថ្ងៃសុក្រកន្លងទៅ ដើម្បីវាយតម្លៃស្ថានភាពមនុស្សធម៌នៅមុនកិច្ចចរចាសន្តិភាព ដែលគ្រោងធ្វើឡើងនៅខែធ្នូរវាងរដ្ឋាភិបាលគាំទ្រដោយក្រុមចម្រុះយេម៉ែន និងក្រុមឧទ្ទាម។
អ្នកនាំពាក្យក្រុមឧទ្ទាម លោក Mohammed Abdessalam បានថ្លែងនៅក្នុងគេហទំព័រធ្វីតធើរថា មានការវាយផ្លូវអាកាស«៣៥ដងរយៈពេល ១២ ម៉ោងចុងក្រោយ នៅក្រុងហ៊ូដេដា អមដោយការវាយកាំភ្លើងធំ»៕ SK