ក្រុងកា្រហ្វាន់បែលៈ ក្រុមឃ្លាំមើល សិទ្ធិមនុស្សបានថ្លែងកាលពីថ្ងៃចន្ទថា មានការវាយប្រហារផ្លូវអាកាសជាច្រើនលើករបស់រុស្ស៊ីជាសម្ព័ន្ធមិតុ្តរបស់របបស៊ីរី បានបណ្តាលឲ្យជនស៊ីវិល ១០ នាក់ស្លាប់ នៅក្នុងនោះមានក្មេង ៥ នាក់ នៅទីតាំងឈរជើងរបស់ក្រុមជីហាដ រយៈពេលប៉ុន្មាន ម៉ោង ក្រោយពីក្រុងមូស្គូ បានប្រកាសបទឈប់បាញ់មួយនៅទីនោះ។
ក្រុមឃ្លាំមើលសិទ្ធិមនុស្សស៊ីរី បានថ្លែងថា ការប៉ះទង្គិចរវាងកងកម្លាំងរបបស៊ីរី និងក្រុមជីហាដ បានផ្ទុះឡើងកាលពីថ្ងៃចន្ទនៅតំបន់គ្រប់គ្រងដោយអតីតអាល់កៃដានៅស៊ីរី ដោយមានការវាយប្រហារផ្លូវអាកាសនៅពេលយប់់។
តំបន់ខេត្ដអ៊ីដលីប ដែលគ្រប់គ្រងដោយក្រុមជីហាដដ៏សកម្ម គឺ Hayat Tahrir al-Sham ត្រូវបានគេសង្ឃឹមថា នឹងត្រូវបានការពារមិនឲ្យមានការវាយលុកទ្រង់ទ្រាយធំពីរដ្ឋាភិបាល ដោយមានកិច្ចព្រមព្រៀងនៅតំបន់ទ្រនាប់កាលពីខែកញ្ញា ប៉ុន្តែរបបស៊ីរី និងរុស្ស៊ី បានបង្កើនការវាយប្រហារកាន់តែខ្លាំងឡើងនៅទីនោះ ចាប់តាំងពីចុងខែមេសា។
ក្រុមឃ្លាំមើលនោះបានថ្លែងថា ការវាយប្រហារផ្លូវអាកាសនៅពេលយប់របស់រុស្ស៊ី បានបណ្តាលឲ្យក្មេង ៥ នាក់ ស្ត្រី ៤ នាក់ និងបុរសម្នាក់ ស្លាប់ នៅក្រុងកា្រហ្វាន់បែល នៃខេត្តអ៊ីដលីប។
ក្រុមឃ្លាំមើលសិទ្ធិមនុស្សមានមូលដ្ឋាននៅអង់គ្លេសបានថ្លែងថា ការវាយប្រហារផ្លូវអាកាសជាច្រើនលើកនៅក្បែរមន្ទីរពេទ្យមួយកន្លែងនៅក្នុងក្រុងកា្រហ្វាន់បែល នាំឲ្យរាំងស្ទះសេវាមើលថែអ្នកជំងឺនៅទីនោះ។
អ្នកកាសែត AFP ម្នាក់បានឃើញលំនៅឋាន ៥ ខ្នង នៅក្នុងក្រុងនេះ ត្រូវបានបំផ្លាញទាំងស្រុង៕ AFP/SK