.jpg)
រថយន្តសាមុយដឹកអ្នករងរបួសនៅកាន់មន្ទីរពេទ្យ ក្រោយផ្ទុះគ្រាប់បែកក្នុងរថយន្តរបស់ក្រុមតាលីបង់នៅច្រកចូលប៉ុស្តិ៍ប៉ូលិសនៅក្រុងកាប៊ិលកាលពីថ្ងៃទី ៧ ខែ សីហា។ AFP
ក្រុងកាប៊ុលៈ មនុស្សជាច្រើនបានរងរបួសនៅពេលរថយន្តបង្កប់គ្រាប់បែករបស់ក្រុមតាលីបង់មួយគ្រឿងដែល បានផ្ទុះនៅក្រុងកាប៊ុលកាលពីថ្ងៃពុធ ដោយបានបណ្តាលឲ្យមានផ្សែងខ្មៅក្រាស់ឃ្មឹកហុយឡើងពីលើរដ្ឋធានីអាហ្វហ្គានីស្ថាន និងកញ្ចក់បង្អួចបានបែកខ្ទាត់រប៉ាត់រប៉ាយទៅឆ្ងាយពីកន្លែងផ្ទុះនោះ។
អំពើហិង្សាកំពុងកើនឡើងនៅទូទាំងប្រទេសអាហ្វហ្គានីស្ថាន និងនៅក្រុងកាប៊ុល ខណៈអាមេរិក និងក្រុមតាលីបង់ បានចរចាណពីកិច្ចព្រមព្រៀងសន្តិភាពមួយឲ្យសម្រេចបាននៅមុនការបោះឆ្នោត ដែលគ្រោងធ្វើឡើងនៅថ្ងៃទី ២៨ ខែ កញ្ញា ខាងមុខនេះ។
អ្នកនាំពាក្យក្រសួងមហាផ្ទៃលោក Nasrat Rahimi បានថ្លែងថា រថយន្តបង្កប់គ្រាប់បែកនោះ បានផ្ទុះឡើងនៅក្បែរច្រកចូលប៉ុស្តិ៍ប៉ូលិសមួយកន្លែង នៅក្រុងកាប៊ុលភាគខាងលិចនៅប្រហែលម៉ោង ៩ ព្រឹក ថ្ងៃទី ៧ ខែ សីហា។
អ្នកនាំពាក្យក្រសួងសុខាភិបាលលោក Wahidullah Mayar បានថ្លែងថា មនុស្សយ៉ាងតិច ៩៥ នាក់ បានរងរបួស ហើយភាគច្រើនជាជនស៊ីវិលនៅក្នុងនោះមានស្ត្រី និងក្មេង ពួកគេត្រូវបានគេបញ្ចូនទៅកាន់មន្ទីរពេទ្យ៕ SK
