ក្រុងចាឡាឡាបាដៈ ក្រុមមន្ត្រី បាននិយាយថា មនុស្សយ៉ាងតិច ១៣ នាក់ បានស្លាប់នៅក្នុងការវាយប្រហារអត្តឃាតមួយទៅលើការជួបជុំយុទ្ធនាការឃោសនាបោះឆ្នោតអាហ្វហ្គានីស្ថានកាលពីថ្ងៃអង្គារ ជាការវាយប្រហារថ្មីបំផុតនៅមុនការបោះឆ្នោតសភានៅខែនេះ។
ការវាយប្រហារនោះ គឺជាការវាយប្រហារអត្តឃាតលើកទី ១ ចាប់តាំងពីយុទ្ធនាការឃោសនានោះ បានចាប់ផ្តើមជាផ្លូវការ កាលពីថ្ងៃសុក្រសប្តាហ៍មុនសម្រាប់ការបោះឆ្នោតសភា ជាការត្រៀមរៀបចំសម្រាប់ការបោះឆ្នោតដែលត្រូវបានរារាំងដោយអំពើហិង្សាបង្ហូរឈាមរួចទៅហើយ។
អ្នកនាំពាក្យអភិបាលខេត្តលោក Ataullah Khogyani បានថ្លែងថា មនុស្សជាង ៤០ នាក់ត្រូវរងរបួស នៅពេលជនសកម្មប្រយុទ្ធម្នាក់ បានបំផ្ទុះខ្លួនគេនៅក្នុងចំណោមអ្នកគាំទ្របេក្ខជនរបស់លោក Abdul Nasir Mohmmand នៅក្នុងស្រុកកាម៉ា នៃខេត្ត Nangarhar ភាគខាងកើត។
លោក Khogyani បញ្ជាក់អះអាងថា លោក Mohmmand នៅមានជីវិតប៉ុន្តែលោកមិនបាននិយាយថា តើបេក្ខជនរូបនេះរងរបួសនៅក្នុងការផ្ទុះនោះដែរឬទេ?
ប្រធានមន្ទីរសុខាភិបាលខេត្ត លោក Najibullah Kamawal បានដាក់ចំនួន អ្នកស្លាប់ខ្ពស់បំផុតត្រឹម ១៤ នាក់ប៉ុណ្ណោះ។
លោក Kamawal បាននិយាយទៀតថា អ្នករងរបួសខ្លះមានស្ថានភាពធ្ងន់ធ្ងរ។
អ្នកកាសែត AFP ម្នាក់ បានឃើញរថយន្តសាមុយជាច្រើនគ្រឿង ដឹកជញ្ជូនសាកសព និងអ្នករងរបួសទៅមន្ទីរពេទ្យនៅក្នុងរដ្ឋធានីនៃខេត្តចាឡាឡាបាដ៕