.jpg)
ប៉ូលិសថៃ ឈរនៅខាងមុខពេទ្យឈៀងរ៉ៃ ខណៈកិច្ចប្រតិបត្តិការសង្រ្គោះនៅបន្ត។ AFP
ស្រុកមែសៃៈ ក្រុមមុជទឹកពិសេសកាលពីថ្ងៃអាទិត្យ បានចាប់ផ្តើមកិច្ចប្រតិបត្តិការដ៏គ្រោះថ្នាក់មួយ ដើម្បីយកក្មេងប្រុស ១២ នាក់ និងគ្រូបង្វឹកបាល់ទាត់របស់ពួកគេ ដែលជាប់នៅក្នុងរូងភ្នំលិចទឹកនៅក្នុងប្រទេសថៃភាគខាងជើងជាង ២ សប្តាហ៍ហើយនោះ ខណៈភ្លៀងរដូវវស្សាបានគំរាមកំហែងកិច្ចប្រឹងប្រែងជួយសង្គ្រោះនេះ។
ក្រុមបាល់ទាត់ Wild Bears បានជាប់នៅក្នុងរូងភ្នំនោះ ចាប់តាំងពីថ្ងៃទី ២៣ ខែមិថុនា។
ស្ថានភាពដ៏លំបាករបស់ពួកគេបានធ្វើឲ្យប្រទេសថៃ និងពិភពលោកទាំងមូលមានការព្រួយបារម្ភយ៉ាងខ្លាំង ខណៈក្រុមអាជ្ញាធរបានខិតខំប្រឹងប្រែងបង្កើតផែនការមួយ ដើម្បីយកក្មេងៗ និងគ្រូបង្វឹករបស់ពួកគេ ចេញពីរូងភ្នំតាមផ្លូវតូចចង្អៀត បត់បែន កន្លុកកន្លៀត និងលិចទឹក។
ប្រធានក្រុមជួយសង្រ្គោះលោក Narongsak Osottanakorn បានថ្លែងប្រាប់ក្រុមអ្នកកាសែតនៅក្បែររូងភ្នំនោះខណៈការព្យាករអាកាសធាតុបានព្រមានថានឹងមានភ្លៀងនៅល្ងាចថ្ងៃអាទិត្យដែលនឹងបង្កមានទឹកជំនន់កាន់តែច្រើនឡើងនៅក្នុងរូងភ្នំនោះថា៖ «ថ្ងៃនេះគឺជា D-day (ថ្ងៃនៃកិច្ចប្រតិបត្តិការពិសេស) បានចាប់ផ្តើម។ ក្មេងៗទាំងនោះត្រៀមប្រឈមនឹងឧបសគ្គជាច្រើន។
លោក Narongsak បានថ្លែងថា ក្មេងប្រុសទី ១ ត្រូវបានគេរំពឹងទុកថានឹងចេញផុតពីរូងភ្នំនៅម៉ោង ៩ យប់ ដែលមានន័យថា ការធ្វើដំណើរត្រូវប្រើពេល ១១ ម៉ោង៕
