.jpg)
ជើងទម្រប្រព័ន្ធមីស៊ីលបច្ចេកវិទ្យាថ្មីបំផុតរបស់កូរ៉េខាងជើង បាញ់សាកល្បងចេញពីតំបន់នៃក្រុង Kaechon ខាងត្បូងក្រុងព្យុងយ៉ាង។ រូប Yonhap
ក្រុងវ៉ាស៊ីនតោន៖ យោធាកូរ៉េខាងត្បូងបានថ្លែងថា កូរ៉េខាងជើង បានបាញ់មីស៊ីលចម្ងាយជិត ២ គ្រាប់ចេញពីតំបន់ភាគខាងលិចទៅកាន់សមុទ្រខាងកើត កាលពីថ្ងៃអង្គាររយៈពេលប៉ុន្មានម៉ោង ក្រោយពីប្រទេសកុម្មុយនីស្តមួយនេះបានយល់ព្រមបន្តការចរចាពីបញ្ហានុយក្លេអ៊ែរជាមួយនឹងអាមេរិកឡើងវិញ។
នាយសេនាធិការយោធាចម្រុះ (JCS) បានថ្លែងថា មីស៊ីលនោះត្រូវបានបាញ់នៅម៉ោង ៦ និង ៥៣ នាទីព្រឹក និងម៉ោង ៧ និង ១២ នាទីព្រឹក ចេញពីតំបន់នៅក្នុងក្រុង Kaechon នៅខេត្តភាគត្បូងនៃក្រុងព្យុងយ៉ាង ចម្ងាយប្រហែល ៨០ គីឡូម៉ែត្រ ពីរដ្ឋធានីព្យុងយ៉ាងភាគខាងជើង នៅក្នុងគោលដៅមួយឆ្ពោះទៅទិសខាងកើត។
នាយសេនាធិការយោធាចម្រុះនោះ បានថ្លែងថា មីស៊ីលទាំង ២ គ្រាប់នោះ ហោះបានចម្ងាយ ៣៣០ គីឡូម៉ែត្រ ដោយបានបន្ថែមថា ក្រុមអាជ្ញាធរចារកម្មរបស់កូរ៉េខាងត្បូង និងអាមេរិក កំពុងវិភាគអំពីប្រភេទមីស៊ីលពិតប្រាកដរបស់ពួកគេ។ ការវិភាគនោះ មិនបានផ្តល់ព័ត៌មានលម្អិតអំពីល្បឿនលឿនបំផុតរបស់មីស៊ីលទាំងនោះទេ។
បុរសម្នាក់កំពុងមើលការបាញ់សាកល្បងមីស៊ីលរបស់កូរ៉េខាងជើង នៅតាមទូរទស្សន៍នៅក្នុងស្ថានីយរថភ្លើង។ AFP
នាយសេនាធិការយោធាចម្រុះបានថ្លែងថា៖ «យោធារបស់យើងកំពុងត្រួតពិនិត្យមើលស្ថានការណ៍នៅក្នុងករណីនៃការបាញ់បន្ថែមទៀត និងកំពុងត្រៀមលក្ខណៈប្រុងជើងការរួចជាស្រេច ដើម្បីទប់ទល់ស្ថានការណ៍នោះ» ដោយអំពាវនាវឲ្យកូរ៉េខាងជើង «បញ្ឈប់សកម្មភាពបែបនេះជាបន្ទាន់ ដែលបានបង្កឲ្យមានភាពតានតឹងកាន់តែខ្លាំងឡើងនៅឧបទ្វីបកូរ៉េ»។
នៅក្នុងការឆ្លើយតបទៅនឹងការបាញ់មីស៊ីលថ្មីបំផុត កូរ៉េខាងត្បូងបានបើកកិច្ចប្រជុំក្រុមប្រឹក្សាសន្តិសុខជាតិ (NSC) ជាបន្ទាន់មួយ ក្រោមអធិបតីភាពរបស់លោក Chung Eui-yong ជាប្រមុខការិយាល័យសន្តិសុខជាតិប្រចាំវិមានប្រធានាធិបតី ដើម្បីពិភាក្សាអំពីបញ្ហានានានៅឧបទ្វីបកូរ៉េ។
នៅក្រុងវ៉ាស៊ីនតោនវិញ មន្ត្រីរដ្ឋាភិបាលជាន់ខ្ពស់អាមេរិកម្នាក់បានថ្លែងថា ខ្លួនត្រូវយល់ដឹងអំពីការបាញ់មីស៊ីលចុងក្រោយបំផុត និងកំពុងត្រួតពិនិត្យមើលស្ថានការណ៍នោះយ៉ាងយកចិត្តទុកដាក់ នៅក្នុងកិច្ចសហប្រតិបត្តិការជាមួយក្រុមសម្ព័ន្ធមិត្តរបស់ខ្លួន។
ការបាញ់មីស៊ីល បានកើតឡើងប៉ុន្មានម៉ោង ក្រោយពីអនុរដ្ឋមន្ត្រីការបរទេសទី ១ របស់កូរ៉េខាងជើង លោក Choe Son-hui បង្ហាញឆន្ទៈបន្តការចរចា៕ Yonhap/SK
