ក្រុងសេអ៊ូលៈ ប្រព័ន្ធផ្សព្វផ្សាយកូរ៉េខាងជើងកាលពីថ្ងៃចន្ទ បានរិះគន់កូរ៉េខាងត្បូងជុំវិញការចរចារបស់ក្រុមការងារជាមួយអាមេរិក ដោយបានជំរុញឲ្យក្រុងសេអ៊ូលដកខ្លួនចេញពីគោលនយោបាយនៃការពឹងផ្អែកទៅលើកម្លាំងបរទេស។
ដោយបាននិយាយយោងដល់ជំនួបដែលត្រូវបានរៀបចំឡើងរវាងសម្ព័ន្ធមិត្តទាំង ២ នៅក្រុងសេអ៊ូលកាលពីដើមខែនេះវេបសាយ Uriminzokkiri ជាវេបសាយមួយក្នុងចំណោមវេបសាយជាច្រើនរបស់កូរ៉េខាងជើងបានឲ្យដឹងថា ទំនាក់ទំនងអន្តរកូរ៉េ នឹងឈានទៅរកការបញ្ចប់ ប្រសិនបើកូរ៉េទាំង ២ នេះ ដកខ្លួនចេញពីគោលការណ៍នៃឯករាជ្យជាតិនោះ។
វេបសាយនោះ បានឲ្យដឹងទៀតថា៖ «ការពិតដែលក្រុមអាជ្ញាធរកូរ៉េខាងត្បូង នាពេលថ្មីៗនេះ បានរៀបចំជំនួបសម្ងាត់ជាមួយអាមេរិកខណៈនិយាយថា ពួកគេមានជំនួបក្រុមការងារ និងកិច្ចសហប្រតិបត្តិការយ៉ាងជិតស្និទ្ធ បានបង្ហាញថា ពួកគេមិនទាន់បានដកខ្លួនចេញពីគោលការណ៍នៃការពឹងផ្អែកលើកម្លាំងបរទេសទេ»។
កូរ៉េខាងត្បូង និងអាមេរិក បានចាប់ផ្តើមក្រុមការងាររួមគ្នានៅក្នុងខែវិច្ឆិកា ដើម្បីសម្របសម្រួលគោលនយោបាយរបស់ពួកគេលើបញ្ហាកូរ៉េខាងជើង។ ជំនួបក្នុងខែនេះ ត្រូវបានរៀបចំឡើងភ្លាមៗ ក្រោយពីកូរ៉េខាងជើង បានបាញ់មីស៊ីលចម្ងាយជិត ៥ ថ្ងៃ ក្រោយពីបាញ់មីស៊ីលចូលទៅក្នុងសមុទ្រខាងកើត។
វេបសាយនោះបាននិយាយទៀតថា ការរំពឹងពីលក្ខខណ្ឌ និងបរិយាកាសល្អប្រសើរនៅក្នុងការទំនាក់ទំនងកូរ៉េខាងជើង-កូរ៉េខាងត្បូង នឹងត្រូវបានបង្កើតឡើងតាមរយៈការស្វះស្វែងរកដំណោះស្រាយពីកម្លាំងខាងក្រៅនោះ គឺជាទង្វើឆ្កួតឡប់ ដែលនឹងកាន់តែធ្វើឲ្យមានការគាំងដំណើរថែមទៀត ដោយអំពាវនាវឲ្យអនុវត្តកិច្ចព្រមព្រៀងជំនួបអន្តរកូរ៉េ៕ Yonhap/PSA