ក្រុងសេអ៊ូល៖ អតីតប្រេសិតនុយក្លេអ៊ែរជាន់ខ្ពស់កូរ៉េខាងជើងលោក Kim Kye-gwan បានថ្លែងកាលពីថ្ងៃសៅរ៍ថា កិច្ចចរចាជាមួយអាមេរិក អាចបន្តនៅពេលណាក្រុងវ៉ាស៊ីនតោនទទួលយកការទាមទាររបស់ក្រុងព្យុងយ៉ាងទាំងស្រុង។
លោក Kim Kye-gwan បច្ចុប្បន្នជាទីប្រឹក្សាក្រសួងការបរទេសក៏បានបញ្ជាក់ថា កូរ៉េខាងជើងនឹងមិនចូលរួមក្នុងការចរចាដោះដូរកម្មវិធីនុយក្លេអ៊ែររបស់ខ្លួន ដើម្បីយកការកាត់បន្ថយទណ្ឌកម្មជាផ្នែកៗ ខណៈដែលខ្លួនបានចូលរួមក្នុងជំនួបនៅក្រុងហាណូយដោយគ្មានកិច្ចព្រមព្រៀងអ្វីសោះរវាងលោកប្រធានាធិបតី ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន កាលពីខែកុម្ភៈ ឆ្នាំ ២០១៩ កន្លងទៅនោះ។
សុន្ទរកថាដែលទីភ្នាក់ងារសារព័ត៌មានមជ្ឈិមរបស់កូរ៉េខាងជើងបានទទួលនោះ បានកើតឡើងបន្ទាប់ពីសារនៅថ្ងៃឆ្នាំថ្មីរបស់មេដឹកនាំកូរ៉េខាងជើង លោក គីម ជុងអ៊ុន ដែលបានព្រមានពីការធ្វើតេស្តអាវុធយុទ្ធសាស្ត្រថ្មីមួយ និងធ្វើឲ្យមានសកម្មភាពជាក់ស្តែងនៅក្នុងការបង្ហាញពីការមិនពេញចិត្តជុំវិញកិច្ចចរចាពីបញ្ហានុយក្លេអ៊ែរជាមួយក្រុងវ៉ាស៊ីនតោន ដែលបានជាប់គាំងនោះ។
លោកបានថ្លែងថា៖ «បញ្ហានេះត្រូវបាន គេនិយាយថាការបន្តការចរចារវាង DPRK និងអាមេរិកអាចនឹងកើតឡើងនៅក្រោមលក្ខខណ្ឌនៃកិច្ចព្រមព្រៀងយ៉ាងច្បាស់លាស់អំពីបញ្ហាដែលត្រូវបានលើកឡើងនាពេលកន្លងទៅនោះ ប៉ុន្តែយើងដឹងយ៉ាងច្បាស់ថា អាមេរិកក៏មិនទាន់បានត្រៀម ហើយក៏មិនទាន់អាចធ្វើដែរ។ DPRK តំណាងឲ្យឈ្មោះផ្លូវការរបស់កូរ៉េខាងជើង គឺសាធារណរដ្ឋប្រជាធិបតេយ្យប្រជាមានិតកូរ៉េ»។
លោកថ្លែងថា៖ «យើងដឹងច្បាស់អំពីផ្លូវដែលគួរដើរ និងផ្លូវត្រូវបន្តដំណើរទៅមុខ»៕ Yonhap/PSA