ក្រុងនីញ៉ាម៉េ៖ ក្រសួងការពារជាតិបានថ្លែងកាលពីថ្ងៃពុធថា ក្រុមជីហាដរាប់រយនាក់បានបើកការវាយប្រហារទៅលើបន្ទាយយោធានីហ្សេ ១ កន្លែង នៅជិតព្រំដែនជាមួយប្រទេស ម៉ាលី ដោយមានការបាញ់ផ្លោង និងកាំភ្លើងត្បាល់ជាច្រើនគ្រាប់ ដែលបណ្តាលឲ្យទាហានចំនួន ៧១ នាក់បានស្លាប់ នៅក្នុងការប្រយុទ្ធគ្នានៅទីនោះ។
ការប្រយុទ្ធគ្នាកាលពីថ្ងៃអង្គារនៅក្នុងភូមិអ៊ីនណេតនៅក្នុងតំបន់ទីលឡាប៊ឺរី គឺជាការវាយប្រហារបណ្តាលឲ្យមនុស្សស្លាប់យ៉ាងច្រើនទៅលើបន្ទាយយោធានីហ្សេ ចាប់តាំងពីមានអំពើហិង្សាបានបង្កឡើងដោយក្រុមជីវពលអ៊ិស្លាមជ្រុលនិយមនៅក្នុងប្រទេសនេះបានចាប់ផ្តើមកាលពីឆ្នាំ ២០១៥។
ក្រសួងការពារជាតិបានថ្លែងនៅក្នុងសេចក្តីថ្លែងការណ៍មួយដែលបានចាក់ផ្សាយនៅលើកញ្ចក់ទូរទស្សន៍ជាតិថា៖ «យើងសូមចូលរួមរំលែកទុក្ខយ៉ាងក្រៀមក្រំបំផុត និងការសោកស្តាយ និងប្រកាសអំពីចំនួនអ្នកស្លាប់ដូចនៅខាងក្រោមនេះ បុគ្គលិកយោធាចំនួន ៧១ នាក់បានស្លាប់ និង ១២ នាក់ផ្សេងទៀតរងរបួស ហើយមួយចំនួនផ្សេងទៀតកំពុងបាត់ខ្លួន»។
សេចក្តីថ្លែងការណ៍នោះ បានឲ្យដឹងថា ការវាយប្រហារនោះ ត្រូវបានធ្វើឡើងដោយ «ក្រុមភេរវករប្រដាប់ដោយអាវុធធុនធ្ងន់ ត្រូវបានគេប៉ាន់ប្រមាណថា មានចំនួនជាងរាប់រយនាក់» ដោយបន្ថែមថា «ក្រុមភេរវករមានចំនួនយ៉ាងច្រើនសន្ធឹកសន្ធាប់ បានបើកការវាយប្រហារនៅទីនោះ»។
ការប្រយុទ្ធគ្នាមានរយៈពេល ៣ ម៉ោង ដោយមានការបាញ់កាំភ្លើងធំជាមួយ «ការប្រើប្រាស់រថយន្តកាមីកាស់ (រថយន្តការពារគ្រាប់) របស់សត្រូវផងដែរ»។
ចំនួនសរុបកាលពីពេលថ្មីៗនេះ ចេញពីប្រភពកងកម្លាំងសន្តិសុខរបស់ប្រទេស នីហ្សេ បានដាក់ចំនួនអ្នកស្លាប់ក្នុងការវាយប្រហារនៅបន្ទាយយោធានោះថា មានចំនួនជាង ៦០ នាក់៕ AFP/SK