.jpg)
ក្រុមយុទ្ធជននិងអតីតយុទ្ធជនមកពីកងកងការពារស្ត្រីឃើដ(YPJ)និងកងការពារប្រជាជន(YPG)ជួបជុំគ្នានៅមុខស្នាក់ងារអង្គការសហប្រជាជាតិ។ AFP
ក្រុងបេរូតៈ មន្ត្រីជាន់ខ្ពស់ម្នាក់បានថ្លែងនៅក្នុងការធ្វើអត្ថាធិប្បាយ ដែលបានចេញផ្សាយកាលពីថ្ងៃអង្គារថា ក្រុងដាម៉ាសបានត្រៀមខ្លួនរួចជាស្រេច ដើម្បីស្វាគមន៍ក្រុមឃើដស៊ីរីត្រឡប់ចូលក្នុងក្រុមវិញ ក្រោយពីក្រុងវ៉ាស៊ីនតោនបានទុកចោលពួកគេឲ្យនៅឯកកោ ដើម្បីប្រឈមមុខជាមួយការគំរាមកំហែងយោធារបស់តួកគី។
ក្រុងអង់ការ៉ាបានគំរាមវាយលុកទ្រង់ទ្រាយធំនៅប្រទេស ស៊ីរី ប្រឆាំងក្រុមជីវពលឃើដដែលខ្លួន បានចាត់ទុកថាជាក្រុមភេរវកម្ម ហើយកងកម្លាំងអាមេរិកកាលពីថ្ងៃចន្ទ បានដកចេញពីតំបន់ព្រំដែនតួកគី ដោយបើកផ្លូវឲ្យមានការចូលឈ្លានពានមួយ ដែលប្រធានាធិបតី រ៉េសិប តៃយីប អេរដូហ្គែនបានថ្លែងថា ការវាយលុកអាចនឹងកើតឡើងនៅថ្ងៃណាមួយជាក់ជាមិនខាន។
អនុរដ្ឋមន្ត្រីការបរទេសលោក ហ្វៃសាល់ ម៉ិកដាដ បានថ្លែងប្រាប់កាសែតគាំទ្ររដ្ឋាភិបាលអាល់-វ៉ាតាន ថា៖ «យើងនឹងការពារទឹកដីរបស់ស៊ីរីទាំងអស់ ហើយយើងនឹងមិនទទួលយកការកាន់កាប់ណាមួយរបស់ទឹកដីស៊ីរីជាដាច់ខាត»។
មន្ត្រីរូបនោះបានថ្លែងថា ក្រុមឃើដត្រូវបាន «បោះបង់ចោល» ដោយក្រុងវ៉ាស៊ីនតោន ក្រោយពីប្រធានាធិបតីអាមេរិកលោក ដូណាល់ ត្រាំ កាលពីថ្ងៃចន្ទ បានផ្តល់ភ្លើងខៀវឲ្យតួកគីដើម្បីបន្ត ជាមួយផែនការប្រតិបត្តិការយោធារបស់ខ្លួននៅទីនោះ៕ SK
