ក្រុងហុងកុងៈ ក្រុងហុងកុង ត្រូវហ៊ុមព័ទ្ធដោយការជួបជុំទ្រង់ទ្រាយធំមួយទៀតកាលពីថ្ងៃអាទិត្យ ខណៈកំហឹងសាធារណៈ បានកាន់តែពុះកញ្ជ្រោលឡើង បន្ទាប់ពីការប៉ះទង្គិចមិនធ្លាប់មានពីមុនរវាងក្រុមអ្នកតវ៉ា និងប៉ូលិសជុំវិញច្បាប់បត្យាប័ន ថ្វីបើមេដឹកនាំក្រុងនេះពន្យារពេលច្បាប់មួយនេះក្តី។
ក្រុមអ្នករៀបចំសង្ឃឹមថានឹងមានអ្នកមកចូលរួមចំនួនច្រើន ខណៈដែលពួកគេ បានប្តេជ្ញាបន្តដាក់សម្ពាធទៅលើប្រមុខប្រតិបត្តិលោកស្រី Carrie Lam បានសម្រេចពន្យារពេលច្បាប់នោះ កាលពីថ្ងៃសៅរ៍ ក្រោយសម្ពាធកាន់តែកើនឡើងប៉ុន្មានថ្ងៃនេះដោយបាននិយាយថា លោកស្រី បានមើលស្រាលដល់ស្មារតីរបស់សាធារណៈជនទាំងអស់។
ក្រុមអ្នករិះគន់ ព្រួយបារម្ភថា ច្បាប់គាំទ្រដោយក្រុងប៉េកាំងនោះប្រជាជននឹងជួបបញ្ហាស្មុគស្មាញ និងតុលាការនានាជាប់ពាក់ព័ន្ធនឹងបញ្ហានយោបាយ និងធ្វើឲ្យខូចកេរ្តិ៍ឈ្មោះរបស់ក្រុងនេះជាមជ្ឈមណ្ឌលពាណិជ្ជកម្មដ៏មានសុវត្ថិភាព។
ក្រុងហុងកុងនេះ ត្រូវបានធ្វើឲ្យមានការរង្គោះរង្គើ ដោយសារអំពើហិង្សានយោបាយដ៏អាក្រក់បំផុត ចាប់តាំងពីអង់គ្លេសប្រគល់ក្រុងនេះឲ្យចិនវិញនៅក្នុងឆ្នាំ ១៩៩៧ ហើយចំណែកកាលពីថ្ងៃពុធសប្តាហ៍មុនវិញ អ្នកតវ៉ារាប់ម៊ឺននាក់ ត្រូវបានបំបែកហ្វូងដោយប៉ូលិសប្រឆាំងកុបកម្ម ដែលបានបាញ់ឧស្ម័នបង្ហូរទឹកភ្នែក និងគ្រាប់កាំភ្លើងកៅស៊ូ។
លោកស្រី Lam បានសម្រេចចិត្តពន្យារពេលច្បាប់នោះ កាលពីថ្ងៃសៅរ៍ ហើយសម្បទាននេះត្រូវបានបដិសេធភ្លាមៗដោយក្រុមមេដឹកនាំតវ៉ាដែលបានអំពាវនាវឲ្យលោកស្រីចុះចេញពីតំណែងលុបច្បាប់នោះចោល និងសុំទោស ចំពោះយុទ្ធសាស្ត្ររបស់ប៉ូលិស។
មនុស្សជិត ៨០ នាក់ បានរងរបួសនៅក្នុងចលាចលកាលពីសប្តាហ៍មុន នៅក្នុងនោះមានមន្ត្រីប៉ូលិស ២២ នាក់ និងអ្នកតវ៉ាម្នាក់បានស្លាប់កាលពីយប់ថ្ងៃសៅរ៍ នៅពេលដែលគេធ្លាក់ពីអគារមួយដែលរូបគេ បានធ្វើការតវ៉ាប្រឆាំងនឹង ច្បាប់បត្យាប័នអស់ជាច្រើនម៉ោងនោះ។
គាត់កាន់បដាដែលគេសរសេរថា៖ «ត្រូវដកច្បាប់បត្យាប័នទៅចិននោះទាំងស្រុង។ យើងទាំងអស់គ្នា មិនធ្វើកុបកម្មទេ។ ពួកយើងគ្រាន់តែធ្វើការតវ៉ាប្រឆាំងនឹងច្បាប់នោះ និងទាមទារសុំឲ្យមានការដោះលែងនិស្សិតទាំងអស់ និងអ្នករងរបួស»។
ការពន្យារពេលច្បាប់នេះ បានធ្វើឲ្យកំហឹងសាធារណៈជននៅក្រុងហុងកុង ថយចុះតិចតួចទេ៕ AFP/PSA