.jpg)
ក្រុមបាតុករអ៊ីរ៉ាក់លើកទង់ជាតិខ្នាតយក្សពីខាងលើក្បាលរបស់ពួកគេនៅក្នុងអំឡុងការតវ៉ាប្រឆាំងរដ្ឋាភិបាលនៅក្នុងក្រុងបាស្រាភាគត្បូង។ AFP
ក្រុងបាកដាដៈ ក្រុមអ្នកឆ្លើយឆ្លងព័ត៌មាន AFP បាននិយាយថា ក្រុមអ្នកតវ៉ានៅក្នុងរដ្ឋធានីអ៊ីរ៉ាក់និងនៅទីក្រុងភាគខាងត្បូងរបស់ខ្លួន បានបិទផ្លូវ សាលារៀន និងការិយាល័យនានារបស់រដ្ឋាភិបាលកាលពីថ្ងៃអាទិត្យ ដោយចលនាតវ៉ានេះកាន់តែខ្លាំងអស់រយៈពេលមួយខែ ដែលបានទាមទារឲ្យមានការផ្លាស់ប្តូរប្រព័ន្ធនយោបាយរបស់ប្រទេសនេះ។
នៅក្រុងបាកដាដ ក្រុមបាតុកររៀននៅសាកលវិទ្យាល័យ បានចតរថយន្តនៅកណ្តាលផ្លូវសំខាន់ៗជាច្រើនកន្លែង ដោយបិទចរាចរណ៍នៅថ្ងៃធ្វើការនៅសប្តាហ៍ដំបូង នៅក្នុងប្រទេសភាគច្រើនកាន់សាសនាមួស្លីមនោះ។
ក្រុមមន្ត្រីប៉ូលិសត្រៀមបង្ក្រាប នៅក្បែរចំណុចត្រួពិនិត្យជាច្រើនកន្លែង បានសម្លឹងមើលពួកគេ ប៉ុន្តែមិនបានចូលធ្វើអន្តរាគមន៍នោះទេ។
ក្រុមនិស្សិតផ្សេងទៀត បានចេញតាមដងផ្លូវនៅក្នុងរៀបចំតវ៉ានៅតាមសាលារៀនរបស់ពួកគេ ហើយចំណែកឯក្រុមសហជីពគ្រូបង្រៀនជាតិរបស់ប្រទេសនេះ បានពង្រីកធ្វើកូដកម្មដែលពួកគេបានចាប់ផ្តើមកាលពីសប្តាហ៍មុន។
ក្រុមវិស្វករ វិជ្ជបណ្ឌិត និងក្រុមមេធាវី ក៏បានរួមគ្នាគាំទ្រការតវ៉ានោះដែរ៕SK
