ក្រុងបាងកកៈ ក្រុមប្រឹក្សាជាតិ ដើម្បីសន្តិភាព និងសណ្តាប់ធ្នាប់ (NCPO) កាលពីថ្ងៃអាទិត្យ បានប្រកាសបិទបញ្ចប់មជ្ឈមណ្ឌលទទួលពាក្យបណ្តឹងរបស់ខ្លួន ខណៈអង្គភាព NCPO នឹងត្រូវបានគេរំលាយចោលនៅពេលគណៈរដ្ឋមន្ត្រីថ្មី ត្រូវស្បថចូលកាន់តំណែងនៅថ្ងៃអង្គារនេះ។
ចាប់តាំងពីមានការចាប់ផ្តើមសារជាថ្មីរបស់ខ្លួនកាលពីខែ កក្កដា ឆ្នាំ ២០១៧ មជ្ឈមណ្ឌលនេះ បានទទួលពាក្យបណ្តឹងចំនួន ៥ ០៧៣ បណ្តឹង ចំនួន ៩១២ ពាក្យបណ្តឹង ដែលជាប់ពាក់ព័ន្ធជាមួយអំពើពុករលួយ។
លោកវរសេនីយ៍ឯក កូ ស៊ីរ៉ីចាន់ ញ៉ាថង ជាអនុប្រធានអ្នកនាំពាក្យរបស់ NCPO បានថ្លែងថា៖ «ករណីទាំងអស់នេះត្រូវបានដាក់ជូនទៅ មជ្ឈមណ្ឌលជាតិប្រឆាំងអំពើពុករលួយ (CNAC) ដើម្បីចាត់វិធានការបន្ថែមទៀត»។
ករណីរសើបជាច្រើន បានកើតឡើងក្រោយពីមជ្ឈមណ្ឌលនេះ បានទទួលរបាយការណ៍ពីសាធារណជននៅក្នុងនោះមានការបង្ក្រាបមួយ បន្ទាប់ពីការកិបកេងមូលនិធិនៅទូទាំងប្រទេស ដែលមានបំណងផ្តល់ឲ្យដល់អ្នកក្រីក្រ និងគម្រោងលទ្ធកម្មរបស់អង្គការរដ្ឋបាលតំបន់ និងការគំរាមយកប្រាក់ពីក្រុមជនចំណាកស្រុកដោយក្រុមមន្ត្រីរដ្ឋាភិបាល។
លោក កូ ស៊ីរ៉ីចាន់ ញ៉ាថង បានថ្លែងថា ក្រៅពីសំណុំរឿពុករលួយមជ្ឈមណ្ឌលនេះ ក៏បានទទួលពាក្យបណ្តឹងចំនួន ៤ ១៦១ អំពីទង្វើមិនល្អ ដែលត្រូវបានប្រព្រឹត្តដោយមន្ត្រីរដ្ឋ និងមន្ត្រីផ្សេងទៀត។ វិធានការ ក៏ត្រូវបានចាត់ឡើងជាបន្តបន្ទាប់ដើម្បីដោះស្រាយសំណុំរឿងទាំងអស់ ប៉ុន្តែមិនទាន់ចប់នៅឡើយទេ៕ BKP/SK