.jpg)
ទិដ្ឋភាពជំនួបរបស់ក្រុមប្រឹក្សាសន្តិសុខអង្គការសហប្រជាជាតិ។ AFP
បុរីញូវយ៉ក: កាលពីថ្ងៃពុធ ក្រុមប្រឹក្សាសន្តិសុខរបស់អង្គការសហប្រជាជាតិ (UNSC) បានអនុម័តជាឯកច្ឆន្ទលើ សេចក្តីសម្រេចលេខ ២៤០៧ បន្តអាណត្តិបេសកកម្មការងាររបស់ក្រុមប្រឹក្សាអ្នកជំនាញការមានតួនាទីធ្វើជាជំនួយការដល់គណៈកម្មាធិការដាក់ទណ្ឌកម្មលើសាធារណរដ្ឋប្រជាមានិតប្រជាធិបតេយ្យកូរ៉េខាងជើង (DPRK) យោងលើសេចក្តីសម្រេចលេខ ១៧១៨ ដោយពន្យារពេលរហូតដល់ថ្ងៃទី ២៤ មេសា ឆ្នាំ ២០១៩។
សេចក្តីសម្រេចនេះ បានចូលជាធរមានភ្លាមៗ បន្ទាប់ពីមានសារាចរមួយផ្សព្វផ្សាយអំពីរបាយការណ៍ចុងបញ្ចប់អំពីក្រុមប្រឹក្សាអ្នកជំនាញការ (PE) ប្រចាំនៅក្រុមប្រឹក្សាសន្តិសុខ កាលពីថ្ងៃទី ១ ខែមីនាកន្លងទៅ។
សេចក្តីសម្រេច ដែលត្រូវបានអនុម័តថ្មីនេះ បានកំណត់ថា៖ «ការបង្កើតការផលិតអាវុធនុយក្លេអ៊ែរ អាវុធគីមី និងអាវុធជីវសាស្ត្រ ក៏ដូចជាមធ្យោបាយក្នុងការប្រើប្រាស់អាវុធទាំងនេះ បន្តគំរាមដល់សន្តិភាពនិងសន្តិសុខអន្តរជាតិ»។
ក្រុមប្រឹក្សាសន្តិសុខនេះ បានបង្ហាញពីបំណងរបស់ខ្លួនក្នុងការត្រួតពិនិត្យនូវអាណត្តិការងារ និងចាត់វិធានការទៅតាមការគួរពាក់ព័ន្ធការបន្តដាក់ ទណ្ឌកម្ម រហូតដល់រយៈពេលមួយមិនលើសពីថ្ងៃទី ២៤ ខែមីនាឆ្នាំ ២០១៩ និងធ្វើការស្នើសុំឲ្យអគ្គលេខាធិការរបស់អង្គការសហប្រជាជាតិ (UN) ចាត់វិធានការផ្នែករដ្ឋបាលនានា ដែលចាំបាច់ត្រូវធ្វើឡើងរហូតដល់ពេលវេលា និងកាលកំណត់នេះ។
ក្រុមប្រឹក្សាសន្តិសុខ បានស្នើសុំឲ្យក្រុមប្រឹក្សាអ្នកជំនាញការធ្វើការផ្តល់ជូនដល់គណៈកម្មាធិការឲ្យបានទាន់ថ្ងៃទី ៣ ខែសីហាឆ្នាំ ២០១៨ និងថ្ងៃទី ៧ ខែកញ្ញាឆ្នាំ ២០១៨ នូវរបាយការណ៍ពាក់កណ្តាលឆមាសរបស់ខ្លួនស្តីអំពីបេសកកម្មនានារបស់ខ្លួន៕
