បុរីញូវយ៉ក៖ ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធបានអនុម័តសេចក្តីសម្រេចមួយ ដើម្បីគាំទ្រលទ្ធផលនៃសន្និសីទក្រុងប៊ែរឡាំងស្តីពីលីប៊ីកាលពីខែមុននេះ។
សេចក្តីសម្រេចលេខ ២៥១០ បានទទួលការគាំទ្រពីសមាជិកចំនួន ១៤ នៃសមាជិកទាំងអស់ ១៥ របស់ក្រុមប្រឹក្សាសន្តិសុខ។ ប្រទេស រុស្ស៊ី អនុបវាទ។
ឯកអគ្គរដ្ឋទូតរបស់ប្រទេស រុស្ស៊ី ប្រចាំនៅអង្គការសហប្រជាជាតិវ៉ាសស៊ីលី ណេបេនហ្សៀ បានថ្លែងនៅក្រោយការបោះឆ្នោតថា មិនគួរមានការប្រញាប់ប្រញាល់ពេកទេនៅក្នុងក្រុមប្រឹក្សានេះ។
សេចក្តីសម្រេចលេខ ២៥១០ បានគាំទ្រលទ្ធផលនៃសន្និសីទក្រុងប៊ែរឡាំងដែលត្រូវបានធ្វើឡើងកាលពីថ្ងៃទី ១៩ ខែមករា និងបានកត់សម្គាល់ថា លទ្ធផលនេះគឺជាធាតុផ្សំដ៏សំខាន់នៃដំណោះស្រាយយ៉ាងទូលំទូលាយចំពោះវិបត្តិនៅប្រទេស លីប៊ី។
ក្រុមអ្នកចូលរួមនៃសន្និសីទក្រុងប៊ែរឡាំង នៅក្នុងនោះមានក្រុមអ្នកតំណាងនៃសមាជិកអចិន្រ្តៃយ៍ទាំង ៥ របស់អង្គការសហប្រជាជាតិបានឯកភាពគ្នាគោរពបម្រាមលក់ដូរអាវុធរបស់ក្រុមប្រឹក្សាសន្តិសុខទៅលើប្រទេស លីប៊ី និងធ្វើការងារក្នុងវិស័យយោធាសេដ្ឋកិច្ច និងនយោបាយដើម្បីឈានទៅរកសន្តិភាពនៅក្នុងប្រទេស លីប៊ី។
សេចក្តីសម្រេចលេខ ២៥១០ បានថ្កោលទោសដល់អំពើហិង្សាកើនឡើងជាច្រើនកម្រិត និងទាមទារឲ្យគ្រប់ភាគីទាំងអស់នៅប្រទេស លីប៊ី ធ្វើការប្តេជ្ញាចំពោះបទឈប់បាញ់យូរអង្វែងមួយ។
សេចក្តីសម្រេចនោះ ក៏បានគាំទ្រការតែងតាំងអ្នកតំណាងគណៈកម្មាការយោធាចម្រុះ ៥+៥ (JMC) នៃរដ្ឋាភិបាលគាំទ្រដោយអង្គការសហប្រជាជាតិនៅក្នុងក្រុងទ្រីប៉ូលី និងកងទ័ពជាតិលីប៊ីមានមូលដ្ឋាននៅភាគខាងកើត (LNA) និងអំពាវនាវឲ្យមានជំនួបរបស់ JMC ឲ្យបន្តកើតឡើង ដើម្បីព្រមព្រៀងទៅលើបទឈប់បាញ់អចិន្រៃ្តយ៍មួយនៅក្នុងនោះមានលក្ខខណ្ឌនៃការយោងដល់យន្តការតាមដាន និងផ្ទៀងផ្ទាត់បទឈប់បាញ់ការបំបែកកងកម្លាំង វិធានការកសាងទំនុកចិត្ត និងបង្កើតក្រុមការងារជាដៃគូដែលគាំទ្រដោយ UN។
សេចក្តីសម្រេចនោះស្នើឲ្យអគ្គលេខាធិការអង្គការសហប្រជាជាតិបញ្ជូនរបាយការណ៍បណ្តោះអាសន្នអំពីលក្ខខណ្ឌចំាបាច់ខ្លះ និងសំណើទៅលើការតាមដានបទឈប់បាញ់ឲ្យមានប្រសិទ្ធភាព នៅក្រោមការគាំទ្ររបស់អង្គការសហប្រជាជាតិនៅពេលបទឈប់បាញ់មួយ ត្រូវបានឯកភាពដោយភាគីលីប៊ីទាំងអស់។
សេចក្តីសម្រេចនេះដែរ ក៏អំពាវនាវឲ្យមានការប្តេជ្ញាចិត្តត្រូវបានធ្វើឡើងនៅសន្និសីទក្រុងប៊ែរឡាំង ដើម្បីអនុវត្តបម្រាមលក់ដូរអាវុធ និងទាមទារឲ្យអនុវត្តពេញលេញដោយបណ្តាប្រទេសសមាជិកជាមួយនឹងបម្រាមលក់ដូរអាវុធនេះ និងទាមទារសមាជិកទាំងអស់មិនឲ្យអន្តរាគមន៍នៅក្នុងជម្លោះនៅប្រទេស លីប៊ី ឬចាត់វិធានការនានាដែលធ្វើឲ្យជម្លោះនេះកាន់តែធ្ងន់ធ្ងរឡើងនោះ។
លីប៊ីត្រូវបានញាំញីដោយអសន្តិសុខ និងការបែកបាក់នយោបាយចាប់តាំងពីមេដឹកនាំដ៏យូរលោក មួអាម៉ា ហ្គាដាហ្វី ត្រូវបានផ្តួលរំលំនៅក្នុងឆ្នាំ ២០១១៕ Xinhua/PSA