.jpg)
ក្រុមអ្នកស៊ើបអង្កេតពិនិត្យមើលបំណែកម៉ាស៊ីនរបស់យន្តហោះដែលធ្លាក់។ AFP
ក្រុងហ្សាការតាៈ ក្រុមសាច់ញាតិរបស់ជនរងគ្រោះធ្លាក់យន្តហោះរាប់រយនាក់កាលពីថ្ងៃអង្គារ បានគោរពវិញ្ញាណក្ខន្ធ នៅកន្លែងដែលយន្តហោះរបស់ក្រុមហ៊ុន LionAir បានធ្លាក់ចូលទៅក្នុងសមុទ្រ ខណៈមានការបង្ហាញឲ្យឃើញនាឡិកាល្បឿនហោះហើរមិនដំណើរការ បាននាំឲ្យមានចម្ងល់ជុំវិញមូលហេតុនៃគ្រោះថ្នាក់នោះ។
ក្រុមអ្នកកាន់ទុក្ខ ដែលមានទឹកភ្នែករលីងរលោងជិះលើនាវា ២ គ្រឿងរបស់កងទ័ពជើង-ទឹកឥណ្ឌូនេស៊ី បានដាក់កម្រងផ្កា និងបោះផ្កាផ្សេងចូលទៅក្នុងសមុទ្រជ្វាជាទីដែលយន្តហោះថ្មីនោះ បានធ្លាក់កាលពីសប្តាហ៍មុន ដោយបានបណ្តាលឲ្យមនុស្ស ១៨៩ នាក់ស្លាប់។
ប៉ូលិស បាននិយាយថា ក្រុមអ្នករុករក បានយកថង់ដាក់សាកសពចំនួន ១៦៤ នាក់ដែលត្រូវបានរកឃើញ ក្រោយពីយន្តហោះធ្លាក់ ប៉ុន្តែរហូតដល់ពេលនេះ ជនរងគ្រោះ ២៧ នាក់ ត្រូវបានរកឃើញអត្តសញ្ញាណ។
យន្តហោះ Boeing737 Max 8 គឺជាយន្តហោះមួយនៅក្នុងចំណោមយន្តហោះថ្មីបំផុតនៅលើពិភពលោក ហើយជាយន្តហោះដឹកអ្នកដំណើរដ៏ទំនើបបំផុត ដែលបានធ្លាក់កាលពីថ្ងៃទី ២៩ ខែតុលា ក្រោយពីហោះឡើង បានរយៈ ១២ នាទី ពីក្រុងហ្សាការតាទៅកាន់ក្រុង Pangkal Pinang នៅលើកោះស៊ូម៉ាត្រា។ យន្តហោះ JT610 បានហោះឡើង ហើយភ្លាមៗនោះ បាន បាត់ពីប្រព័ន្ធរ៉ាដាតែម្តង។
ក្រុមអ្នកមុជទឹក បានរកឃើញប្រអប់ខ្មៅកត់ត្រាទិន្នន័យហោះហើរ ប៉ុន្តែនៅតាមស្វែងរកប្រអប់ខ្មៅកត់ត្រាសំឡេងកន្លែងពីឡុត៕
