ស្រុកមែសៃៈ ក្រុមអ្នកជួយសង្គ្រោះថៃ បានប្តេជ្ញាជម្លៀសក្មេងប្រុស ១២ នាក់ និងគ្រូបង្វឹកបាល់ទាត់របស់ពួកគេចេញពីរូងភ្នំដែលលិចទឹកជំនន់នោះដោយមិនឲ្យមានគ្រោះថ្នាក់ ខណៈវីដេអូថ្មីបានចេញកាលពីថ្ងៃពុធ ដោយបានបង្ហាញឲ្យឃើញថា ពួកគេមានសុខភាពល្អ និងស្មារតីរឹងមាំ បន្ទាប់ពីរុករកពួកគេយ៉ាងវក់វីរយៈពេល ៩ ថ្ងៃ ក្រោយការបាត់ខ្លួន។
ការជម្លៀសក្មេងទាំងអស់នោះ ចេញពីបរិវេណរូងភ្នំដែលលិចនៅឡើយនោះត្រូវបានរំពឹងទុកថា ដំណើរការអូសបន្លាយពេលវេលាយូរ ដោយមានឧបសគ្គច្រើនសម្រាប់ក្រុមដែលមិនមែនជាអ្នកមុជទឹកនិងអ្នកខ្លះក្នុងចំណោមពួកគេត្រូវបានគេជឿថា មិនចេះហែលទឹក។
ដោយប្រទេសមួយកំពុងផ្តោតការយកចិត្តទុកដាក់យ៉ាងខ្លាំងទៅលើបេសកកម្មជួយសង្គ្រោះនោះ ក្រុមអាជ្ញាធរបានបញ្ជាក់ថា ពួកគេនឹងនាំយកក្មេងទាំងអស់ចេញពីរូងភ្នំ នៅពេលណាសុវត្ថិភាពរបស់ពួកគេត្រូវធានាថ្វីបើភ្លៀងរដូវវស្សា ត្រូវបានព្យាករថានឹងបន្តធ្លាក់ នៅពេលឆាប់ៗនេះក្តី។
លោក Narongsak Osottanakorn អភិបាលខេត្តឈៀងរ៉ៃ បានថ្លែងប្រាប់ក្រុម អ្នកកាសែតកាលពីថ្ងៃពុធថា៖ «យើងមានទំនុកចិត្តមួយរយភាគរយថាគ្មានគ្រោះថ្នាក់ចំពោះក្មេងៗទាំងនោះទេ នៅមុនយើងជម្លៀសពួកគេ»។
លោក Narongsak បានថ្លែងទៀតថា៖ «យើងនឹងយកចិត្តទុកដាក់ថែទាំពួកគេដូចជាកូនរបស់យើងដែរ»៕