.jpg)
រថយន្តក្រុង ១ គ្រឿង កំពុងដឹកអ្នកដំណើរដែលចុះពីនាវា Diamond Princess នៅទីក្រុងយ៉ូកូហាម៉ា។ AFP
ក្រុងយ៉ូកូហាម៉ា៖ អ្នកដំណើរជាច្រើននាក់ដែលត្រូវបានជួយសង្គ្រោះ បានចាប់ផ្តើមចាកចេញពីនាវាកម្សាន្តដែលបានញាំញីដោយមេរោគកូរ៉ូណាប្រភេទថ្មីមួយ នៅក្នុងប្រទេស ជប៉ុន កាលពីថ្ងៃពុធ ក្រោយពីការធ្វើតេស្តបានរកឃើញថា មិនមានឆ្លងវីរុសផ្លូវដង្ហើមនោះទេ ដែលបច្ចុប្បន្នបានបណ្តាលឲ្យមនុស្សជាង ២ ០០០ នាក់ស្លាប់នៅក្នុងប្រទេស ចិន។
នាវាកម្សាន្ត Diamond Princess បានបង្ហាញអំពីការឆ្លងរីករាលដាលមេរោគផ្លូវដង្ហើមប្រភេទថ្មី ដោយមានករណីការឆ្លងមេរោគយ៉ាងតិច ៥៤២ នាក់ ហើយប្រទេស ជប៉ុន បានប្រឈមនឹងការរិះគន់យ៉ាងខ្លាំង ជុំវិញការរៀបចំដាក់មនុស្សឲ្យនៅដាច់ដោយឡែកពីគេរបស់ខ្លួនថា ជាការបំបែកក្រុមអ្នកដំណើរឲ្យនៅឆ្ងាយពីគ្នា។
អ្នកដំណើរជនជាតិជប៉ុនម្នាក់មានវ័យ ៧៧ ឆ្នាំ ដែលបានសុំមិនបញ្ចេញឈ្មោះរបស់គាត់ បាននិយាយថា៖ «ខ្ញុំត្រូវបានគេជួយសង្គ្រោះ ហើយខ្ញុំត្រូវការឈប់សម្រាកឲ្យបានស្រួលខ្លួន»។ លោកបាននិយាយថា លោកបាននិងកំពុងជិះរថភ្លើងទំនើបដ៏ល្បីល្បាញរបស់ជប៉ុន ទៅផ្ទះរបស់លោកវិញ។
រថយន្តក្រុងពណ៌លឿងជាច្រើនគ្រឿង រួមជាមួយរថយន្តតាក់ស៊ីមួយចំនួនផ្សេងទៀត ត្រូវបានតម្រង់ជួរគ្នា ដើម្បីដឹកអ្នកដំណើរមកពីជុំវិញពិភពលោក ពួកគេបានអូសវ៉ាលីសរៀងៗខ្លួនឡើងជិះរថយន្ត។
អ្នកដំណើរម្នាក់ (ស្តាំ) ចាកចេញដោយធ្វើដំណើរថ្មើរជើង ក្រោយពីចុះពីនាវាកម្សាន្ត ១ គ្រឿង (ខាងក្រោយ) នៅទីក្រុងយូ៉កូហាម៉ា ប្រទេស ជប៉ុន។ AFP
ក្រុមអ្នកដំណើរមួយចំនួនបានបក់ដៃលាគ្នា ខណៈពួកគេបានចាកចេញពីក្រុមអ្នកដែលនៅលើនាវាកម្សាន្តនោះ មានអ្នកខ្លះក្នុងចំណោមពួកគេដែលនៅលើនាវាអាចត្រូវបានគេមើលឃើញថា កំពុងបោយដៃត្រឡប់ទៅវិញ ចេញពីយ៉មុខរបស់នាវានោះ។
នាវា Diamond Princess គឺជានាវាធំជាងគេបំផុតនៅខាងក្រៅប្រទេស ចិន ជាទីដែលតួលេខថ្មីបានបង្ហាញឲ្យឃើញថា ចំនួនអ្នកស្លាប់កើនឡើងជាង ២ ០០០ នាក់ ដោយអ្នកឆ្លងវីរុសផ្លូវដង្ហើមនេះ មានជាង ៧៤ ០០០ នាក់ ហើយមានរាប់រយករណីបន្ថែមទៀត ត្រូវបានគេរាយការណ៍នៅក្នុងប្រទេសចំនួន ២៤។
ប្រទេស កូរ៉េខាងត្បូង បានរាយការណ៍ថា មានករណីឆ្លងថ្មីចំនួន ១៥ នាក់បន្ថែមទៀត ដោយចំនួនសរុបរបស់ខ្លួនមានការកើនឡើងជិត ៥០ ភាគរយ នៅក្នុងនោះមានមនុស្សយ៉ាងតិច ១១ នាក់ នៅទីក្រុងដែហ្គូភាគខាងត្បូង។
ចំពោះអ្នកដំណើរ ៥០០ នាក់ ដែលត្រូវបានអនុញ្ញាតឲ្យចុះពីនាវា ក្រោយពីធ្វើតេស្តរកឃើញថា អវិជ្ជមានរយៈពេលដាក់ឲ្យនៅដាច់ដោយឡែក ១៤ ថ្ងៃ យ៉ាងលំបាកនោះបានចប់ ក្រោយពីដំណើរកម្សាន្តជួបការភ័យរន្ធត់៕ AFP/SK
