.jpg)
ក្រុមអ្នកតវ៉ាស៊ូដង់ ជួបជុំគ្នានៅក្នុងការតវ៉ាមួយនៅខាងក្រៅធនាគារកណ្តាលក្នុងក្រុងខារទុំ។ AFP
ក្រុងខារទុំៈ ក្រុមអ្នកដំណើររាប់រយនាក់បន្តជាប់គាំងនៅក្នុងរដ្ឋធានីស៊ូដង់កាលពីថ្ងៃពុធ ខណៈបុគ្គលិកចំណតរថយន្តក្រុង បានឈប់ធ្វើការនៅថ្ងៃទី ២ ដើម្បីគាំទ្រក្រុមអ្នកតវ៉ាដែលទាមទារឲ្យក្រុមឧត្តមសេនីយ៍ កំពុងកាន់អំណាចចុះចេញពីតំណែង។
ក្នុងកិច្ចប្រឹងប្រែងបង្កើនការដាក់សម្ពាធទៅលើក្រុមប្រឹក្សាយោធា ដែលកំពុងកាន់អំណាច ក្រោយពីទម្លាក់លោកប្រធានាធិបតី អូមារ-អាល់-បាសៀរ សម្ព័ន្ធមិត្ត ដើម្បីសេរីភាព និងចលនាតវ៉ាការផ្លាស់ប្តូរ បានអំពាវនាវឲ្យមានការចាប់ផ្តើមធ្វើកូដកម្មជាទូទៅរយៈពេល ២ ថ្ងៃ ដែលបានចាប់ផ្តើមកាលពីថ្ងៃអង្គារ។
មន្ត្រីបុគ្គលិករដ្ឋាភិបាលរាប់ពាន់នាក់ ដូចជាវិស័យឯកជន ធនាគារ ក្រុមហ៊ុន និងកំពង់ផែស៊ូដង់ បានធ្វើកូដកម្មកាលពីថ្ងៃអង្គារ ដោយទទូចថា មានតែអំណាចស៊ីវិលទេ អាចជួយឲ្យប្រទេស ស៊ូដង់ រួចផុតពីវិបត្តិនយោបាយរបស់ខ្លួនបាន។
កាលពីថ្ងៃពុធ ព្រលានយន្តហោះទីក្រុងបានចាប់ផ្តើមឲ្យដំណើរការជាធម្មតាឡើងវិញ ក្រោយពីមានចំនួនបុគ្គលិកជាច្រើន បានឈប់ធ្វើការកាលពីថ្ងៃអង្គារនោះ ប៉ុន្តែជើងហោះហើរមួយចំនួនរបស់ប្រទេស ស៊ូដង់ ដូចជា ជើងហោះហើរ Badr Tarco និង Nova បានបន្តពន្យារពេល។
លោក Mohamed Hamadan Dagolo អនុប្រធានក្រុមប្រឹក្សាយោធា ធ្វើសន្និសីទកាសែត។ AFP
នៅកន្លែងចំណតរថយន្តសំខាន់ៗ ក្រុមអ្នកដំណើរដែលជាប់តែលតោល កំពុងស្វែងរកការដឹកជញ្ជូនឯកជន ដើម្បីទៅដល់គោលដៅរបស់ពួកគេ ខណៈបុគ្គលិកក្រុមហ៊ុនរថយន្តក្រុងនៅបន្តធ្វើកូដកម្មនោះ។
លោក ម៉ូហាម៉េដ អាល់-អាមីន ដែលកំពុងព្យាយាមធ្វើដំណើរទៅកាន់រដ្ឋកាស់សាឡាបានថ្លែងថា៖ «នេះគឺជាថ្ងៃទី ២ ហើយដែលខ្ញុំបានមកចំណតរថយន្តក្រុងជាមួយគ្រួសាររបស់ខ្ញុំ ហើយខ្ញុំនៅតែមិនអាចធ្វើដំណើរបានដដែល»។
«បច្ចុប្បន្ននេះ ខ្ញុំកំពុងព្យាយាមជួលរថយន្តឯកជនជាមួយក្រុមអ្នកដំណើរ។
កាសែតខ្លះ មិនអាចបោះពុម្ពផ្សាយកាសែតរបស់ពួកគេបាននោះទេ ដោយសារតែបុគ្គលិកផ្នែកបោះពុម្ពរបស់ពួកគេទៅចូលរួមធ្វើកូដកម្ម។
ម្ចាស់កាសែត Al-Mjher គឺលោក Al-Hindi Ezzeddine បានថ្លែងនៅក្នុងគេហទំព័រធ្វីធើរថា៖ «កាសែតរបស់ខ្ញុំ រងការប៉ះពាល់ដោយសារក្រុមអ្នកបច្ចេកទេសផ្នែកបោះពុម្ពមិនមកធ្វើការ»។
នៅមុនធ្វើកូដកម្ម ២ ថ្ងៃ ក្រុមមេដឹកនាំតវ៉ា បានថ្លែងថា ក្រុមគ្រូពេទ្យ មេធាវី តុលាការនិងបុគ្គលិកក្រុមហ៊ុនអគ្គិសនី ធនធានទឹក ក្រុមហ៊ុនដឹកជញ្ជូនសាធារណៈ ទូរគមនាគមន៍ វិស័យអាកាសចរណ៍ស៊ីវិល ធ្វើកូដកម្មដែរ៕ AFP/SK
