ក្រុងហុងកុងៈ ក្រុមអ្នកតវ៉ាប្រឆាំងរដ្ឋាភិបាល នៅតែគ្រប់គ្រងផ្លូវសំខាន់ៗនៅក្នុងក្រុងហុងកុងកាលពីថ្ងៃចន្ទ មួយថ្ងៃក្រោយពីក្រុមអ្នករៀបចំបាននិយាយថា មនុស្ស ២ លាននាក់ បានសម្រុកឡើងទៅតាមដងផ្លូវ ដើម្បីតវ៉ាជាប្រវត្តិសាស្ត្រប្រឆាំងមេដឹកនាំក្រុង ដែល គាំទ្រដោយក្រុងប៉េកាំង។
ហ្វូងមនុស្សជាច្រើនបានហែក្បួនជាច្រើនម៉ោង នៅក្រោមកម្តៅថ្ងៃកាលពីថ្ងៃអាទិត្យ ដោយបានអំពាវនាវឲ្យលោកស្រីប្រមុខប្រតិបត្តិ Carrie Lam ដែលបានបង្ខំចិត្តពន្យារពេលច្បាប់ដែលនឹងអនុញ្ញាតឲ្យធ្វើបត្យាប័នទៅចិនដីគោក ចុះចេញពីតំណែង។
ក្រុមអ្នករិះគន់ព្រួយបារម្ភថា ច្បាប់គាំទ្រដោយក្រុងប៉េកាំងនោះ នឹងធ្វើឲ្យប្រជាជនជួបបញ្ហាស្មុគស្មាញ និងតុលាការនានាជាប់ពាក់ព័ន្ធនឹងបញ្ហានយោបាយ និងធ្វើឲ្យខូចកេរ្តិ៍ឈ្មោះរបស់ក្រុងនេះ ជាមជ្ឈមណ្ឌលពាណិជ្ជកម្មដ៏មានសុវត្ថិភាព។
អ្នកតវ៉ាស្លៀកពាក់ពណ៌ខ្មៅជាច្រើនក្រុម បានដើររាប់គីឡូម៉ែត្រឆ្លងកាត់ផ្លូវជាច្រើនទៅកាន់សភានៅក្នុងក្រុងហុងកុងដោយក្រុមអ្នករៀបចំបានប៉ាន់ប្រមាណថា ចំនួនអ្នកចូលរួមការជួបជុំនៅក្នុងក្រុង ដែលមានប្រជាជន ៧,៣ លាននាក់ កើនឡើងទ្វេដង។
ការប៉ាន់ប្រមាណនោះ មិនត្រូវបានផ្ទៀងផ្ទាត់ដោយឯករាជ្យ ប៉ុន្តែត្រូវបានបញ្ជាក់ថាជាបាតុកម្មធំបំផុតនៅក្នុងប្រវត្តិសាស្ត្ររបស់ក្រុងហុងកុង។
ប៉ូលិស ដែលបានធ្វើការប៉ាន់ប្រមាណចំនួនទាបជាងនេះចំពោះការតវ៉ានយោបាយ បាននិយាយថា ៣៣ ៨០០០ នាក់ បានចេញមកធ្វើបាតុកម្មកាលពីថ្ងៃអាទិត្យ។
រហូតមកទល់ព្រឹកថ្ងៃចន្ទ ហ្វូងមនុស្ស បានថយចុះមកត្រឹមប៉ុន្មានរយនាក់ទេ ភាគច្រើនអ្នកតវ៉ាក្មេងៗ បានកាន់កាប់ផ្លូវហាយវ៉េមួយនៅខាងក្រៅសភា និងផ្លូវខ្លះទៀតនៅក្បែរនោះ៕ AFP/PSA