ក្រុងប៉ារីសៈ ក្រុមអ្នកតវ៉ាបារាំង «អាវកាក់ពណ៌លឿង» បានប៉ះទង្គិចជាមួយប៉ូលិសប្រឆាំងកុបកម្មនៅក្នុងការតវ៉ាជុំថ្មីប្រឆាំងនឹងប្រធានាធិបតីអេម៉ានុយអែល ម៉ាក្រុង ប៉ុន្តែក្រុងនេះទំនងជាគេចផុតពីការបំផ្លាញទ្រង់ទ្រាយធំរយៈពេល ១ សប្តាហ៍ ដោយសារមានការរឹតបន្តឹងផ្នែកសន្តិសុខយ៉ាងតឹងរ៊ឹងបំផុត។
ក្រុមអ្នកតវ៉ា បានដុតបំផ្លាញ រថយន្តជាច្រើនគ្រឿង ដុតរបាំងផ្លូវ និងវាយកម្ទេចបង្អួចអគារនៅក្នុងអំពើហិង្សានៅទូទាំងកណ្តាលក្រុង ខណៈរថពាសដែកជាច្រើនគ្រឿងចល័តតាមដងផ្លូវនានា។
ចៅហ្វាយក្រុងប៉ារីស លោក Anne Hidalgo បានសរសេរនៅលើគេហទំព័រធ្វីធើរថា៖ «ម្ចាស់ហាងរាប់សិបនាក់ បានក្លាយជាជនរងគ្រោះ ដោយសារភាពចលាចលនៅក្នុង ក្រុងនេះ»។
ការប៉ះទង្គិច ក៏បានផ្ទុះឡើងនៅពេលតវ៉ានៅក្រុងដទៃទៀតក្នុងនោះ មានក្រុងម៉ាកសីយ៍ ប៊កដូ លីយ៉ុង និងក្រុងទូលូ នៅក្នុងអំឡុងការតវ៉ានៅចុងសប្តាហ៍ទី ៤ នៅទូទាំងប្រទេសប្រឆាំងការចំណាយខ្ពស់សម្រាប់ការរស់នៅ និងប្រឆាំងលោកម៉ាក្រុង។
នៅក្នុងក្រុងប៉ារីស មានសំឡេងស្រែកថា «ម៉ាក្រុង ចុះចេញពីតំណែង លាយឡំជាមួយឧស្ម័នបង្ហូរទឹកភ្នែក ខណៈមនុស្សរាប់ពាន់នាក់ បានជួបជុំគ្នានៅរុក្ខវិថី Champs-Elysees»។
ដុំផ្សែងក្រាស់ឃ្មឹកហុយចេញពីភ្លើងឡើងទៅលើអាកាស។ហាងជាច្រើន និងហាងកាហ្វេ Starbucks ត្រូវបានគេចូលលួចទ្រព្យសម្បត្តិ។
ការផ្ទុះអំពើហិង្សានោះ ទ្រង់ទ្រាយតូចជាងការបំផ្លាញ និងការលួចទ្រព្យសម្បត្តិកាលពី ១ សប្តាហ៍មុន នៅពេលដែល រថយន្តប្រហែល ២០០ គ្រឿង ត្រូវក្រុមអ្នកតវ៉ាដុត ជាអំពើកុបកម្មអាក្រក់បំផុតនៅក្នុងក្រុងប៉ារីស៕