ក្រុងកូលកាតា៖ ក្រុមអ្នកតវ៉ាហិង្សារាប់ពាន់នាក់បានចេញតាមដងផ្លូវ ដើម្បីប្រាប់មេដឹកនាំរបស់ប្រទេស ឥណ្ឌា ថា លោកមិនត្រូវបានគេស្វាគមន៍នៅក្នុងទីក្រុងកូលកាតាកាលពីថ្ងៃសៅរ៍នោះទេ នៅក្នុងការជួបជុំចុងក្រោយបំផុតប្រឆាំងច្បាប់សញ្ជាតិ ដែលក្រុមអ្នករិះគន់បាននិយាយថា ច្បាប់នេះរើសអើងប្រឆាំងក្រុមជនជាតិភាគតិចមូស្លីមនៅឥណ្ឌា។
ការធ្វើបាតុកម្មនៅតាមដងផ្លូវទ្រង់ទ្រាយធំ និងការប៉ះទង្គិចគ្នាបណ្តាលឲ្យមនុស្សស្លាប់ម្តងម្កាល បានបង្កឲ្យប្រទេសកាន់សាសនាហិណ្ឌូភាគច្រើនធ្លាក់ចូលទៅក្នុងវិបត្តិចលាចល ចាប់តាំងពីច្បាប់សញ្ជាតិនេះ ត្រូវបានអនុម័តដោយសភាកាលពីខែមុន។
ប៉ូលិសបានថ្លែងថា ក្រុមអ្នកតវ៉ាជិត ៣ ម៉ឺននាក់ បានចេញតាមដងផ្លូវនានានៃទីក្រុងកូលកាតា ដើម្បីប្រកាសបដិសេធមិនស្វាគមន៍ដំណើរទស្សនកិច្ចរបស់លោកនាយករដ្ឋមន្ត្រី ណារិនដ្រា ម៉ូឌី ដោយមានការកាន់ដៃគ្នាយ៉ាងច្រើនសន្ធឹកសន្ធាប់ ដើម្បីបង្កើតជារនាំងមនុស្សដែលមានចម្ងាយជិត ២ គីឡូម៉ែត្រ នៅពាសពេញផ្លូវនៃទីក្រុងធំភាគខាងកើត។
អ្នកស្រី ស៊ូរីតា រ៉យ ជាស្ត្រីម្នាក់ដែលបានចូលរួមប្រមូលផ្តុំបានប្រាប់ AFP ថា៖ «អ្វីដែលយើងកំពុងប្រយុទ្ធប្រឆាំងដើម្បីអនាគតរបស់ឥណ្ឌាយើង»។
ក្រុមហ្វូងមនុស្សបានឡោមព័ទ្ធព្រលានយន្តហោះរបស់ទីក្រុងមួយនេះ ហើយបានស្រែកពាក្យស្លោកថា «យើងប្រឆាំងហ្វាស៊ីសនិយម» ខណៈដែលយន្តហោះរបស់មេដឹកនាំប្រទេស ឥណ្ឌា បានចុះចតនៅមុនលោក ណារិនដ្រា ម៉ូឌី បានផ្លាស់ប្តូរទៅជិះឧទ្ធម្ភាគចក្រយោធាមួយវិញ ដែលបានដឹកលោកទៅកាន់គេហដ្ឋានរបស់មេដឹកនាំរដ្ឋវ៉េសប៊ែងហ្គាល់ គឺលោកស្រី ម៉ាម៉ាតា បាន់ណឺរជី ដែលជាអ្នករិះគន់ឥតសំចៃមាត់ម្នាក់របស់រដ្ឋាភិបាលជាតិនិយមកាន់សាសនាហិណ្ឌូដែលកំពុងគ្រប់គ្រងអំណាចរបស់លោក ម៉ូឌី៕ AFP/SK