ក្រុងម៉ារ៉ាកេស្ហៈ ក្រុមអ្នកនយោបាយមកពីជុំវិញពិភពលោក បានជួបគ្នានៅប្រទេសម៉ារ៉ុកកាលពីថ្ងៃចន្ទ ដើម្បីចូលរួមសន្និសីទដ៏សំខាន់មួយក្នុងគោលបំណងអនុម័តកិច្ចព្រមព្រៀងចំណាកស្រុកមួយរបស់អង្គការសហប្រជាជាតិ ថ្វីបើមានប្រទេសខ្លះដកខ្លួនចេញជាបន្តបន្ទាប់ដោយសារប្រជាប្រិយនិយមប្រឆាំងនឹងជនអន្តោប្រវេសន៍ក្តី។
កិច្ចព្រមព្រៀមពិភពលោកដើម្បីចំណាក-ស្រុកដោយទៀងទាត់ សុវត្ថិភាព និងមានសណ្តាប់ធ្នាប់ត្រូវបានបញ្ចប់នៅអង្គការសហប្រជាជាតិ កាលពីខែកក្កដា ក្រោយពីការចរចារយៈពេល ១៨ ខែ និងត្រូវគ្រោងអនុម័តជាផ្លូវការនៅក្នុងសន្និសីទរយៈពេល ២ ថ្ងៃនៅក្នុងក្រុងម៉ារ៉ាកេស្ហ។
រដ្ឋាភិបាលអាមេរិក បានទាត់ចោលការចរចាកាលពីចុងឆ្នាំ ២០១៧ និងចាប់តាំងពីពេលនោះមក មានប្រទេសអូស្ត្រាលីអូទ្រីស សាធារណរដ្ឋឆែក សាធារណរដ្ឋដូមីនិក ហុងគ្រី ឡេតូនី ប៉ូឡូញ និងប្រទេសស្លូវ៉ាគី បានដកខ្លួនចេញពីដំណើរការចរចានោះ។
កាលពីថ្ងៃសុក្រ អាមេរិក បានរិះគន់កិច្ចព្រមព្រៀងនោះជាថ្មីដោយបានចាត់ទុកកិច្ចព្រមព្រៀងមួយនេះជាកិច្ចប្រឹងប្រែងរបស់អង្គការសហប្រជាជាតិ ដើម្បីឈានដល់ការគ្រប់គ្រងពិភពនៅក្រោមសិទ្ធិអធិបតេយ្យរបស់ប្រទេសទាំងអស់។
ប៉ុន្តែប្រទេសដទៃទៀត ដែលដឹកនាំដោយអធិការបតីអាល្លឺម៉ង់ លោកស្រី អេនជេឡា មឺរកែល នៅក្នុងប្រទេសម៉ារ៉ុកដើម្បីអនុម័តកិច្ចព្រមព្រៀងនោះ និងអង្គការសហប្រជាជាតិ នៅតែមានសុទិដ្ឋិនិយមថា កិច្ចព្រមព្រៀងនេះ អាចជួយពិភពលោក ដោះស្រាយវិបត្តិចំណាកស្រុកបានល្អប្រសើរ។
នៅមុនសន្និសីទនេះ តំណាងពិសេសរបស់អង្គការសហប្រជាជាតិទទួលបន្ទុកកិច្ចការចំណាកស្រុក លោកស្រី Louise Arbour បានវាយបកក្រុមអ្នករិះគន់ដល់កិច្ចព្រមព្រៀងនេះ ដោយបានបញ្ជាក់ថា កិច្ចព្រមព្រៀងនេះមានអត្ថប្រយោជន៍តាមផ្លូវច្បាប់៕