ក្រុងហ្សាការតាៈ ប្រធានគណៈកម្មាធិការជាតិសុវត្ថិភាពការដឹកជញ្ជូនឥណ្ឌូនេស៊ី បានថ្លែងកាលពីថ្ងៃព្រហស្បតិ៍ថាប្រអប់ខ្មៅមួយរបស់យន្តហោះនៃក្រុមអាកាសចរណ៍ Lion Air ដែលបានធ្លាក់នោះហើយត្រូវបានគេរកឃើញគឺមានសារៈសំខាន់ណាស់ ចំពោះមូលហេតុដែលបានបណ្តាលឲ្យយន្តហោះនោះធ្លាក់។
ប្រអប់ខ្មៅនោះកត់ត្រាព័ត៌មានអំពីល្បឿនយន្តហោះរយៈកម្ពស់ និងទិសដៅរបស់យន្តហោះ និងការសន្ទនារបស់យានិកហោះហើរ និងអាចផ្តល់តម្រុយសំខាន់ៗដល់មូលហេតុដែលបណ្តាលឲ្យយន្តហោះនោះធ្លាក់ បង្កឲ្យមនុស្សស្លាប់យ៉ាងច្រើននោះ។
លោក Soerjanto Tjahjono បានថ្លែងប្រាប់ AFP ថា៖ «ពួកយើងបានរកឃើញប្រអប់ខ្មៅ ១ ក្នុងចំណោមប្រអប់ខ្មៅទាំង ២ នោះ»។
គេមិនទាន់ដឹងថា តើវាគឺជាប្រអប់ខ្មៅថតទិន្នន័យហោះហើរ ឬប្រអប់ខ្មៅថតសំឡេងកន្លែងសម្រាប់អ្នកបើកយន្តហោះនោះទេ។
យន្តហោះ Boeing-737 MAX 8 ដែលទើបបានដាក់ឲ្យដំណើរការបានត្រឹមតែ ២-៣ ខែកន្លងផុតទៅប៉ុណ្ណោះហើយបានធ្លាក់ចូលទៅក្នុងសមុទ្រជ្វានៅឆ្នេរភាគខាងជើងឥណ្ឌូនេស៊ីកាលពីថ្ងៃចន្ទ ដោយបានបណ្តាលឲ្យមនុស្ស ១៨៩ នាក់ស្លាប់ត្រឹមតែ ១២ នាទីបន្ទាប់ពីហោះចេញពីក្រុងហ្សាការតាឆ្ពោះទៅកាន់ក្រុង Pangkal Pinang។
យន្តហោះ Boeing នេះ គឺយន្តហោះថ្មីបំផុត នៅក្នុងចំណោមយន្តហោះដឹកអ្នកដំណើរក្នុងពិភពលោក៕