.jpg)
ទាហានអាហ្វហ្គានីស្ថាន ឈរយាម និងត្រួតពិនិត្យទីតាំងនៃការវាយប្រហារគ្រាប់បែកអត្តឃាត។ AFP
ក្រុងម៉ូស្គូ៖ ក្រសួងការបរទេសរុស្ស៊ីបាននិយាយកាលពីថ្ងៃសៅរ៍ថា គណៈប្រតិភូតាលីបង់មួយក្រុម បានធ្វើការពិភាក្សាជាមួយក្រុមមន្ត្រីរុស្ស៊ីនៅក្នុងក្រុងម៉ូស្គូ ក្រោយពីការចរចារបស់អាមេរិកជាមួយក្រុមអ្នកបះបោរអាហ្វហ្គានីស្ថានបានបរាជ័យ។
ដោយត្រូវបានដកស្រង់សម្តីដោយទីភ្នាក់ងារសារព័ត៌មាន RIA Novosti អ្នកនាំពាក្យក្រសួងម្នាក់បានថ្លែងថា៖ «តំណាងពិសេសរបស់ប្រធានាធិបតីរុស្ស៊ីប្រចាំនៅអាហ្វហ្គានីស្ថាន លោក Zamir Kabulov បានធ្វើជាម្ចាស់ផ្ទះទទួលគណៈប្រតិភូតាលីបង់មួយក្រុមនៅក្រុងម៉ូស្គូ»។
អ្នកនាំពាក្យរូបនោះ បានថ្លែងថា៖ «ភាគីរុស្ស៊ីបានសង្កត់ធ្ងន់ពីតម្រូវការ ដើម្បីធ្វើការចរចាជាថ្មីរវាងអាមេរិក និងចលនាតាលីបង់»។
លោកបានថ្លែងបន្ថែមថា៖ «សម្រាប់ផ្នែករបស់ពួកគេ ក្រុមតាលីបង់បានបញ្ជាក់ពីឆន្ទៈក្នុងការបន្តការចរចារបស់ពួកគេជាមួយក្រុងវ៉ាស៊ីនតោន»។
រហូតដល់ ១ សប្តាហ៍កន្លងទៅនេះ ការរំពឹងទុក បានកើនឡើងចំពោះកិច្ចព្រមព្រៀងអាមេរិក តាលីបង់ ដែលនឹងមើលឃើញអាមេរិកដកទ័ពជាច្រើនកម្រិតចេញពីអាហ្វហ្គានីស្ថាន និងក្រុមតាលីបង់ ផ្តល់ការធានាសន្តិសុខ ដើម្បីធ្វើឲ្យក្រុមជ្រុលនិយមចេញពីទឹកដីនេះ។
ប៉ុន្តែកាលពីសប្តាហ៍មុន លោក ត្រាំ បានលាតត្រដាងថា លោកបានលុបចោលកិច្ចប្រជុំមួយដែលមិនធ្លាប់មានពីមុនរវាងក្រុមតាលីបង់ និងខ្លួនលោកផ្ទាល់នៅអាមេរិក និងបានប្រកាសថា ការចរចាជាមួយក្រុមជនសកម្មប្រយុទ្ធនោះ «ស្លាប់» បាត់ទៅហើយ៕ AFP/PSA
