.jpg)
ឯកអគ្គរដ្ឋទូត US លោក Terry Branstad ត្រូវក្រុងប៉េកាំងកោះប្រជុំជុំវិញទណ្ឌកម្មប្រឆំាងយោធាចិន។ AFP
ក្រុងប៉េកាំងៈ ប្រព័ន្ធផ្សព្វផ្សាយបានឲ្យដឹងថា ចិនបានកោះប្រជុំឯកអគ្គរដ្ឋទូតអាមេរិកកាលពីថ្ងៃសៅរ៍ ដើម្បីធ្វើការតវ៉ាជាផ្លូវការជុំវិញទណ្ឌកម្មដាក់ដោយអាមេរិកប្រឆាំងនឹងអង្គការយោធាចិនមួយចំពោះការទិញយន្តហោះប្រតិបត្តិកម្មជាច្រើនគ្រឿង និងមីស៊ីលពីរុស្ស៊ី។
សេចក្តីប្រកាសនោះ បានកើតឡើង ១ ថ្ងៃ ក្រោយពីចិនបានអំពាវនាវឲ្យអាមេរិកដកទណ្ឌកម្មទាំងនោះ បើមិនដូច្នេះទេនឹងទទួលផលវិបាកចំពោះទង្វើរបស់ខ្លួនវិញ។
ជម្លោះនោះ បានបន្ថែមទៅលើភាពតានតឹងរវាងមហាអំណាចពិភពលោកទាំង ២ ជុំវិញជម្លោះពាណិជ្ជកម្ម ការប្រព្រឹត្តរបស់ក្រុមសាសនាចិន និងការទាមទារប្រជុំកោះដែលមានជម្លោះនៅក្នុងសមុទ្រចិនខាងត្បូង។
កាសែត People''s Daily បានឲ្យដឹងក្នុងរបាយការណ៍សង្ខេបមួយតាមប្រព័ន្ធអ៊ីនធឺណិតថា អនុរដ្ឋមន្ត្រីការបរទេសចិនលោក Zheng Zeguang បានកោះហៅឯកអគ្គរដ្ឋទូតអាមេរិកលោក Terry Branstad និងបានធ្វើបទបង្ហាញអំពីទណ្ឌកម្មរបស់អាមេរិកប្រឆាំងនឹងយោធាចិន។
កាលពីថ្ងៃព្រហស្បតិ៍ ក្រុងវ៉ាស៊ីនតោន បានដាក់ទណ្ឌកម្មហិរញ្ញវត្ថុទៅលើនាយកដ្ឋានអភិវឌ្ឍឧបករណ៍នៃក្រសួងការពារជាតិ និងមន្ត្រីរដ្ឋបាលកំពូលរបស់ខ្លួនចំពោះការទិញយន្តហោះចម្បាំងធុន Sukhoi Su-35 ជាច្រើនគ្រឿង និងប្រព័ន្ធការពារមីស៊ីល S-400 បាញ់ពីផ្ទៃរាបទៅលើអាកាសពីប្រទេសរុស្ស៊ី។
ក្រុមមន្ត្រីបាននិយាយថា វាជាលើកទី ១ ដែលប្រទេសទី ៣ មួយត្រូវរងទណ្ឌកម្មនៅក្រោមច្បាប់ទណ្ឌកម្ម CAATSA ចំពោះការទិញដូរអាវុធជាមួយរុស្ស៊ី និងបង្ហាញឲ្យ ឆន្ទៈនៃរដ្ឋការលោកត្រាំ ធ្វើឲ្យទំនាក់ទំនងការទូតកាត់បន្ថយ៕
