ក្រុងវ៉ាស៊ីនតោនៈ ប្រទេស ចិន កាលពីថ្ងៃអង្គារ បានចោទប្រកាន់អាមេរិកពីបទរិះគន់ប្រព័ន្ធគ្រប់គ្រង និងគោលនយោបាយរបស់ខ្លួនក្រោយពីលោករដ្ឋមន្ត្រីការបរទេស ម៉ៃក៍ ប៉ុមប៉េអូ បានធ្វើអត្ថាធិប្បាយអំពី «ការប្រកាន់ពូជសាសន៍ និងភាពក្រអឺតក្រទម» ចំពោះការបង្ក្រាប បង្ហូរឈាមទៅលើការតវ៉ានៅទីលាន Tiananmen។
ប្រតិកម្មទាំងកំរោល បានកើតឡើង ក្រោយពីលោក ប៉ុមប៉េអូ បានថ្លែងនៅមុនថ្ងៃបុណ្យប្រារព្ធខួបលើកទី៣០ នៃការបង្ក្រាបយ៉ាងបង្ហូរឈាមកាលពីថ្ងៃទី ៤ ខែ មិថុនា ឆ្នាំ ១៩៨៩ ថា ក្រុងវ៉ាស៊ីនតោន បានបាត់បង់ក្តីសង្ឃឹមចំពោះការរីកចម្រើនផ្នែកសិទ្ធិមនុស្សនៅក្នុងប្រទេស ចិន។
អ្នកនាំពាក្យស្ថានទូតក្រុងប៉េកាំង នៅក្រុងវ៉ាស៊ីនតោន បានថ្លែងនៅក្នុងសេចក្តីថ្លែងការណ៍មួយថា អ្នកណាក៏ដោយបានប៉ុនប៉ង «ដើម្បីគាំទ្រ និងធ្វើបាបប្រជាជនចិននោះ នឹងត្រូវបានបញ្ចប់នៅក្នុងការលុបបំបាត់ចេញពីប្រវត្តិសាស្ត្រជាក់ជាមិនខាន»។
អ្នកនាំពាក្យរូបនោះបានថ្លែងថា លោក ប៉ុមប៉េអូ បានប្រើប្រាស់ «ហេតុផលសិទ្ធិមនុស្ស» ដើម្បីធ្វើសេចក្តីថ្លែងការណ៍មួយ ដែល «បានធ្វើអន្តរាគមន៍គួរឲ្យស្អប់ខ្ពើមបំផុតនៅក្នុងកិច្ចការផ្ទៃក្នុងរបស់ប្រទេស ចិន ជាការវាយប្រហារមកលើប្រព័ន្ធគ្រប់គ្រងរបស់ខ្លួន និងធ្វើឲ្យប៉ះពាល់ដល់គោលនយោបាយការបរទេសរបស់ប្រទេស ចិន។
«នេះ គឺជាការប្រមាថចំពោះប្រជាជនចិន និងជាការរំលោភច្បាប់អន្តរជាតិ និងបទដ្ឋានជាមូលដ្ឋានដែលគ្រប់គ្រងលើផ្នែកទំនាក់ទំនងអន្តរជាតិ»។
ភាគីចិន បានសម្តែងការមិនពេញចិត្តយ៉ាងខ្លាំងរបស់ខ្លួន និងធ្វើការប្រឆាំងយ៉ាងដាច់អហង្ការចំពោះសេចក្តីថ្លែងការណ៍របស់លោក ម៉ៃក៍ ប៉ុមប៉េអូ»៕ AFP/SK