ក្រុងប៉េកាំងៈ ប្រទេសចិនបានព្រមានអង់គ្លេសឲ្យឈប់ជ្រៀតជ្រែតក្រុងហុងកុងក្រោយពីមន្ត្រីជាន់ខ្ពស់អង់គ្លេសម្នាក់ បានអំពាវនាវឲ្យមេដឹកនាំមជ្ឈមណ្ឌលហិរញ្ញវត្ថុអន្តរជាតិ បង្ហាញកង្វល់ជុំវិញការតវ៉ាដែលបានធ្វើឲ្យក្រុងនេះរង្គោះរង្គើរយៈពេល ២ ខែមកហើយនោះ។
ការតវ៉ាគាំទ្រលទ្ធិប្រជាធិបតេយ្យ ដែលត្រូវបានបង្កឡើងដោយកំហឹងទូទៅចំពោះការបាត់បង់សិទ្ធិសេរីភាពនៅក្នុងក្រុងហុងកុងបានក្លាយទៅជាការគំរាមកំហែងធំបំផុតចំពោះការគ្រប់គ្រងក្រុងចិនពាក់កណ្តាលស្វយ័តភាគខាងត្បូងចាប់តាំងពីអង់គ្លេសប្រគល់ក្រុងនេះទៅឲ្យចិនវិញនៅក្នុងឆ្នាំ ១៩៩៧ មក។
យោងតាមក្រសួងការបរទេសបានឲ្យដឹងថាកាលពីថ្ងៃសុក្រលោករដ្ឋមន្ត្រីការបរទេសអង់គ្លេស ដូមីនីក រ៉ាអាប់ បានសន្ទនាតាមទូរស័ព្ទជាមួយលោកស្រីមេដឹកនាំក្រុងហុងកុង ការី ឡាម ដែលលោកបានបញ្ជាក់ពីតម្រូវការចាំបាច់ឲ្យបើកការស៊ើបអង្កេតឯករាជ្យពេញលេញទៅលើព្រឹត្តិការណ៍ថ្មីៗដោយបានជំរុញឲ្យមានការឆ្លើយតបពីក្រុងប៉េកាំង។
អ្នកនាំពាក្យក្រសួងការបរទេសចិនលោក Hua Chunying បានថ្លែងកាលពីថ្ងៃសៅរ៍ថា៖ «ប្រទេសចិនពិតជាបានទាមទារថា ភាគីអង់គ្លេសគួរបញ្ឈប់សកម្មភាពទាំងអស់ដែលបានជ្រៀតជ្រែកកិច្ចការរបស់ក្រុងហុងកុងជាបន្ទាន់ និងឈប់ជ្រៀតជ្រែកកិច្ចការផ្ទៃក្នុងរបស់ចិន»។
ដោយបានរិះគន់ការសម្រេចចិត្តរបស់លោក រ៉ាអាប់ ហៅលោកស្រី ការី ឡាម ថា មានកំហុសនោះលោក Hua បានជំរុញឲ្យអង់គ្លេសឈប់បង្កបញ្ហានៅក្នុងក្រុងហុងកុងនៅក្នុងសេចក្តីថ្លែងការណ៍តាមអ៊ីនធឺណិតនោះ។
ក្រុងប៉េកាំងបានបង្កើនការទប់ស្កាត់ការតវ៉ាប្រឆាំងរដ្ឋាភិបាលនៅតំបន់ពាក់កណ្តាលស្វយ័ត ដែលត្រូវបានផ្តល់មូលនិធិដោយលោកខាងលិច ប៉ុន្តែបានផ្តល់ភ័ស្តុតាងតិចតួចលើសពីសេចក្តីថ្លែងការណ៍គាំទ្រចេញពីក្រុមអ្នកនយោបាយលោកខាងលិចនោះ។
កាលពីសប្តាហ៍មុនរដ្ឋាភិបាលចិនបានរិះគន់ក្រុងវ៉ាស៊ីនតោនក្រោយពីមានរបាយការណ៍លើកឡើងថា អ្នកការទូតអាមេរិកប្រហែល ៣០ រូបមានមូលដ្ឋាននៅក្រុងហុងកុងបានជួបជាមួយក្រុមសកម្មជនគាំទ្រប្រជាធិបតេយ្យ។
ក្រសួងការបរទេសចិនបានជំរុញឲ្យអាមេរិកធ្វើការបោសសម្អាតជាមួយក្រុមអ្នកតវ៉ាប្រឆាំងចិន និងឈប់ជ្រៀតជ្រែកកិច្ចការផ្ទៃក្នុងរបស់ក្រុងហុងកុងជាបន្ទាន់។
ភាពតានតឹង កើនឡើងខ្ពស់នៅក្នុងមជ្ឈមណ្ឌលហិរញ្ញវត្ថុអាស៊ីមួយនេះ ក្រោយពីភ្លាមៗនោះបានរីកចម្រើនក្លាយជាចលនាទាមទារឲ្យមានការកែទម្រង់តាមបែបលទ្ធិប្រជាធិបតេយ្យ។
កាលពីសប្តាហ៍មុនក្រុងនេះមើលឃើញកូដកម្មជាទូទៅដោយកម្រ និងភាពចលាចលរាលដាលនៅក្នុងការតវ៉ារយៈពេល ២ ខែដោយប៉ូលិសបានបាញ់ឧស្ម័នបង្ហូរទឹកភ្នែក ៨០០ គ្រាប់ទៅលើក្រុមអ្នកតវ៉ា តែក្នុងរយៈពេល ១ ថ្ងៃនៅរាប់សិបទីតាំង៕ PSA