.jpg)
តារាងបង្ហាញពីអាវុធសំខាន់ៗដែលមាននៅក្នុងការលក់អាវុធរបស់ US មានតម្លៃ ២,២ ពាន់លានដុល្លារទៅឲ្យតៃវ៉ាន់។ AFP
ក្រុងប៉េកាំងៈ ប្រទេស ចិន កាលពីថ្ងៃអង្គារ បានទាមទារឲ្យអាមេរិក «លុបចោលកិច្ចព្រមព្រៀងលក់អាវុធដែលមានតម្លៃ ២,២ ពាន់លានដុល្លារ ទៅឲ្យកោះតៃវ៉ាន់ នៅក្នុងនោះមានរថក្រោះសម្រាប់ប្រយុទ្ធ និងមីស៊ីលប្រឆាំងនឹងយន្តហោះចម្បាំង ដោយនាំឲ្យភាពតានតឹងរវាងប្រទេសមហាអំណាចទាំង ២ កាន់តែកើនឡើងខ្លាំង។
នេះ គឺជាការលក់អាវុធយោធារបស់អាមេរិកដ៏ធំលើកទី១ ទៅឲ្យកោះគ្រប់គ្រងតាមបែបប្រជាធិបតេយ្យអស់ជាច្រើនទសវត្សរ៍ ហើយបានកើតឡើង ខណៈដែលទំនាក់ទំនងរវាងក្រុងវ៉ាស៊ីនតោន និងក្រុងប៉េកាំង ត្រូវបានជាប់គាំងដោយសារសង្គ្រាមពាណិជ្ជកម្មរបស់ពួកគេនោះ។
អ្នកនាំពាក្យក្រសួងការបរទេសលោក Geng Shuang បានថ្លែងនៅក្នុងសន្និសីទ កាសែតមួយថា ប្រទេស ចិន បានដាក់បណ្តឹងជាផ្លូវការតាមរយៈការទូត ដែលបានសម្តែងការ «មិនពេញចិត្ត និងប្រឆាំងជំទាស់» វិធានការនេះ។
អ្នកនាំពាក្យក្រសួងការបរទេសចិនលោក Geng Shuang ធ្វើសន្និសីទសារព័ត៌មាន។ រូបថត AFP
យោងតាមទីភ្នាក់ងារកិច្ចសហប្រតិបត្តិការសន្តិសុខការពារជាតិអាមេរិក (DSCA) បានឲ្យដឹងថា កិច្ចព្រមព្រៀងទិញលក់អាវុធ រួមមានរថក្រោះ M1A2T Abrams ចំនួន ១០៨ គ្រឿង មីស៊ីលប្រឆាំងយន្តហោះចម្បាំង 250 Stinger ប្រឆាំងយន្តហោះចម្បាំងជាច្រើនគ្រាប់ និងសម្ភារយោធាដែលត្រូវបានគេសន្និដ្ឋានថា មានតម្លៃទឹកប្រាក់ជាង ២,២ ពាន់លានដុល្លារ។
ទីភ្នាក់ងារ DSCA បានថ្លែងថា សំណើទិញលក់អាវុធនោះ «នឹងត្រូវផ្តល់ជូនរថក្រោះប្រយុទ្ធប្រតិកម្មរហ័សដ៏ទំនើបទៅឲ្យកោះតៃវ៉ាន់» ដើម្បីកែលម្អប្រព័ន្ធការពារអាកាសរបស់ខ្លួន និង «គាំទ្រគោលនយោបាយបរទេស និងសន្តិសុខជាតិរបស់អាមេរិក តាមរយៈការជួយកែលម្អសន្តិសុខ និងសមត្ថភាពការពារ (របស់កោះតៃវ៉ាន់)»។
ទីភ្នាក់ងារនោះបានបន្ថែមថា កិច្ចព្រមព្រៀងទិញលក់អាវុធ នឹងមិនអាចផ្លាស់ប្តូរ «តុល្យភាពយោធាជាមូលដ្ឋាននៅក្នុងតំបន់នោះទេ» ហើយក៏បានរាយការណ៍ជូនសភាដែរ។ក្រុមសមាជិកសភាអាមេរិកមានពេល ៣០ ថ្ងៃ ដើម្បីជំទាស់ទៅនឹងការលក់អាវុធទាំងនោះ ប៉ុន្តែសភាអាមេរិក មិនទំនងជាធ្វើដូច្នោះទេ។
រថក្រោះ M1A2 របស់អាមេរិក បាញ់គ្រាប់ពិតនៅក្នុងសមយុទ្ធរួមរវាងអាមេរិក និងកូរ៉េខាងត្បូងនាពេលកន្លងទៅ។ AFP
លោក Geng បានថ្លែងថា កិច្ចព្រមព្រៀងទិញលក់អាវុធ «ជាការបំពានគោលការណ៍ចិនតែមួយយ៉ាងធ្ងន់ធ្ងរ» និង «ជាការជ្រៀតជ្រែកទាំងស្រុង» នៅកិច្ចការផ្ទៃក្នុងរបស់ប្រទេស ចិន មួយនេះ។
លោក Geng បានថ្លែងថា៖ «ចិនជំរុញឲ្យអាមេរិកលុបចោលផែនការលក់អាវុធជា បន្តបន្ទាន់ ហើយឈប់ទំនាក់ទំនងជាមួយក្រុងតៃប៉ិទៀត ដើម្បីបញ្ចៀសការបែកបាក់ទំនាក់ទំនងចិនអាមេរិក និងធ្វើឲ្យអន្តរាយដល់សន្តិភាព និងស្ថិរភាពនៅក្នុងច្រកសមុទ្រតៃវ៉ាន់។
កោះតៃវ៉ាន់ ត្រូវបានគ្រប់គ្រងដាច់ដោយឡែកពីប្រទេស ចិន ចាប់តាំងពីបញ្ចប់សង្គ្រាមស៊ីវិលនៅឆ្នាំ ១៩៤៩ ប៉ុន្តែក្រុងប៉េកាំង បានចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួន ហើយត្រូវយកមកគ្រប់គ្រងវិញ។
ចិនបានបង្កើនសម្ពាធយោធា និងការទូតទៅលើក្រុងតៃប៊ិចាប់តាំងពីលោកស្រីសៃ អ៊ីងវិនជាប់ឆ្នោតជាប្រធានាធិបតីកាលពីឆ្នាំ ២០១៦៕ AFP/SK
