.jpg)
លោក Rodrigo Duterte ចូលរួមជំនួបអាស៊ានលើកទី៣៤ នៅក្រុងបាងកក។ AFP
ក្រុងម៉ានីលៈ អ្នកនាំពាក្យប្រធានាធិបតីហ្វីលីពីនលោក Rodrigo Duterte បានថ្លែងកាលពីសៅរ៍ថា ប្រទេស ចិន និងហ្វីលីពីន បានឯកភាពគ្នាធ្វើការស៊ើបអង្កេតរួមលើករណីលិចទូកនេសាទហ្វីលីពីនបណ្តាលមកពីនាវាចិន ១ គ្រឿង នៅក្នុងជម្លោះដែនសមុទ្រចិន។
ឧប្បត្តិហេតុកាលពីថ្ងៃទី ៩ ខែ មិថុនា នៅពេលទូក ២ គ្រឿង បានបុកគ្នានៅក្នុងដែនទឹកសមុទ្រចិនខាងត្បូង បានបង្កឲ្យមានការផ្ទុះកំហឹងជាសាធារណៈយ៉ាងខ្លាំង។
ក្រុងម៉ានីល បានចោទប្រកាន់នាវាចិនពីបទបោះបង់ចោលក្រុមសមាជិកនាវាជានាវិកហ្វីលីពីនចំនួន ២២ នាក់ ក្រោយមកត្រូវបានជួយសង្គ្រោះដោយក្រុមអ្នកនេសាទវៀតណាម ប៉ុន្តែក្រុងប៉េកាំងបានទាត់ចោលការចោទប្រកាន់នោះ។
ប្រទេស ចិន បានបញ្ជាក់ថា នាវាចិនគ្រាន់តែ «បានប៉ះទង្គិច» នាវានោះតែប៉ុណ្ណោះ ហើយបានព្យាយាមជួយសង្គ្រោះក្រុមអ្នកនេសាទទាំងនោះ ប៉ុន្តែ «ភ័យខ្លាចមានការឡោមព័ទ្ធដោយទូកនេសាទហ្វីលីពីនផ្សេងទៀតមកយាយីនោះ»។
អ្នកនាំពាក្យរបស់លោកប្រធានាធិបតីគឺលោក Salvador Panelo បានថ្លែងនៅក្នុងសេចក្តីថ្លែងការណ៍ថា លោក Rodrigo Duterte បានទទួលយកការផ្តល់ជូនរបស់រដ្ឋាភិបាលចិន ក្នុងការធ្វើការស៊ើបអង្កេតរួមគ្នានៅក្នុងឧប្បត្តិហេតុនោះ «ដើម្បីប្តេជ្ញាចិត្តទៅនឹងអ្វី ដែលបានកើតឡើងឲ្យពិតប្រាកដនោះ»។
លោក Salvador Panelo បានបន្ថែមថា ក្រុមស៊ើបអង្កេតនោះគួរ «មានលក្ខណសម្បត្តិឲ្យគ្រប់គ្រាន់ និងមានសមត្ថភាពរៀងៗខ្លួន ដោយទាំងភាគីហ្វីលីពីន និងប្រទេស ចិន ដែលត្រូវមានអ្នកតំណាងម្នាក់មួយ និងសមាជិកទី៣ ត្រូវមកពីប្រទេសអព្យាក្រឹត»។
អ្នកនាំពាក្យក្រសួងការបរទេសចិនកាលពីថ្ងៃព្រហស្បតិ៍ បានអំពាវនាវឲ្យមានការស៊ើបអង្កេតលើករណីទូកបុកគ្នានោះ៕ AFP/SK
