ក្រុងគុរ៉ាស៊ីគីៈ កាលពីថ្ងៃអង្គារ ក្រុមអ្នកធ្វើការងារជួយសង្គ្រោះ បានធ្វើការរុករកពីផ្ទះមួយទៅផ្ទះមួយ ដោយមានក្តីសង្ឃឹមតិចតួចក្នុងការស្វែងរកក្រុមអ្នកនៅរស់ ក្រោយពីទឹកជំនន់ និងបាក់ដី ដែលបានបណ្តាលឲ្យមនុស្ស ១៥៦ នាក់ស្លាប់ ជាមហន្តរាយមួយក្នុងចំណោមមហន្តរាយជាច្រើនទាក់ទងនឹងអាកាសធាតុអាក្រក់បំផុតសម្រាប់ប៉ុន្មានទសវត្សរ៍ចុងក្រោយនេះ។
កំណត់ត្រាភ្លៀងធ្លាក់ខ្លាំងដែលបានចាប់ផ្តើមកាលពីសប្តាហ៍មុន បានរាំងទៅវិញនិងទឹកជំនន់ស្រកបានបង្ហាញពីការបំផ្លាញ ដែលបានផ្តាច់តំបន់មួយរហូតដល់ភាគខាងលិចនៃប្រទេសនេះ។
នៅក្នុងក្រុងគុរ៉ាស៊ីគី ទឹកជំនន់ បានធ្វើឲ្យលិចលង់សង្កាត់ជាច្រើន ដោយបានបង្ខំឲ្យមនុស្សខ្លះ ឡើងលើដំបូលផ្ទះរបស់ពួកគេដើម្បីរង់ចាំការជម្លៀស។
ក្រុមអ្នកជួយសង្គ្រោះ បាន ខិតខំប្រឹងប្រែងដើរពីផ្ទះមួយទៅផ្ទះមួយ ដើម្បីស្វែងរកអ្នកនៅរស់ ឬ ជនរងគ្រោះដោយសារមហន្តរាយនោះ។
មន្ត្រីរដ្ឋាភិបាលម្នាក់នៅខេត្តអូកាយ៉ាម៉ា បានថ្លែងប្រាប់ AFP ថា៖ «វាគឺជាអ្វីដែលយើងហៅថាកិច្ចប្រតិបត្តិការតាមបណ្តាញ ជាទីដែលយើងកំពុងឆែកផ្ទះម្តងមួយៗ ដើម្បីរកឲ្យឃើញថា តើមានមនុស្សជាប់នៅក្នុងផ្ទះដែរឬទេ?»។ «យើងដឹងថា វាគឺជាកិច្ចប្រឹងប្រែងជួយសង្គ្រោះបន្ទាន់យើងបាននិងកំពុងព្យាយាមរុករកតាមអាចធ្វើបាន»។
លោក Hideto Yamanaka កំពុងដឹកនាំអ្នកពន្លត់អគ្គិភ័យមួយក្រុមប្រហែល ៦០ នាក់ ត្រូវបានបញ្ជូនចេញក្រៅខេត្ត ដើម្បីឲ្យឆែករកមនុស្សនៅតាមផ្ទះ។
លោក Yamanaka មានអាយុ ៥៣ ឆ្នាំថ្លែងថា៖ «ខ្ញុំខ្លាចថា មនុស្សចាស់ៗនៅតែម្នាក់ឯង ប្រហែលជាមិនអាចគេចពីទឹកជំនន់បានទេ»៕