ក្រុងប៉ាលូៈ មនុស្សជិត ១ ៤០០ នាក់ ត្រូវបានគេដឹងថាបានស្លាប់នៅក្នុងគ្រោះរលកយក្សស៊ូណាមិ ដែលបានវាយប្រហារកោះ Sulawesi ដោយក្រុមមន្ត្រីអង្គការសហប្រជាជាតិព្រមានថា ត្រូវការជំនួយបន្ទាន់ជាច្រើនសម្រាប់ក្រុមអ្នកនៅរស់ ហើយក្រុមអ្នកជួយសង្រ្គោះ នៅតែស្វែងរកជនរងគ្រោះ។
ការិយាល័យជំនួយមនុស្សធម៌អង្គការសហប្រជាជាតិ បានឲ្យដឹងថា ប្រជាជនជិត២០មឺុននាក់ កំពុងត្រូវការជំនួយជាបន្ទាន់ក្នុងចំណោមពួកគេ មានកុមាររាប់ពាន់នាក់ ហើយតាមការប៉ាន់ប្រមាណផ្ទះសម្បែង ៦៦ ០០០ ខ្នង ត្រូវបានបំផ្លាញ ឬ ខូតខាតដោយសាររញ្ជួយដីមានកម្លាំង៧,៥រិុកទ័រ និងរលកស៊ូណាមិ។
ក្រុមអ្នកនៅរស់កំពុងទប់ទល់ការស្រកទឹក និងឃ្លានអាហារខ្លាំង ដោយអាហារ និងទឹកស្អាតខ្វះខាតយ៉ាងខ្លាំង ហើយមន្ទីរពេទ្យជាច្រើននៅក្នុងតំបន់ ទទួលព្យាបាលអ្នករងរបួសច្រើនហួសប្រមាណ។
លោក Jens Laerke មកពីការិយាល័យជំនួយមនុស្សធម៌អង្គការសហប្រជាជាតិ បានថ្លែងប្រាប់ក្រុមអ្នកកាសែតនៅក្នុងក្រុងហ្សឺណែវកាលពីល្ងាចថ្ងៃអង្គារថា៖ «អារម្មណ៍ចេញក្រុមអ្នកធ្វើការនៅទីនោះ បង្ហាញពីការសោកស្តាយយ៉ាងពិតប្រាកដ»៕ NS