ក្រុងប៉េកាំង៖ ចំនួនអ្នកស្លាប់ដោយសារវីរុសកូរ៉ូណាប្រភេទថ្មីនៅប្រទេស ចិន បានឡើងដល់ ១ ១០០ នាក់ កាលពីថ្ងៃពុធ ប៉ុន្តែករណីឆ្លងថ្មីថយចុះរយៈពេល ២ ថ្ងៃជាប់គ្នា ខណៈ ដែលអង្គការសុខភាពពិភពលោក (WHO) បានអំពាវនាវឲ្យមានសាមគ្គីភាពជាសកល ដើម្បីប្រយុទ្ធប្រឆាំងនឹងវីរុសដែល «គំរាមកំហែងដ៏ខ្លាំងក្លា» នេះ។
ខណៈក្រុងប៉េកាំងខិតខំប្រឹងប្រែងទប់ស្កាត់វីរុសនេះ មិនឲ្យរាលដាលនោះ ចំនួនអ្នកដែលបានឆ្លងនៅលើនាវាកម្សាន្តនៅឆ្នេរសមុទ្រជប៉ុនកើនឡើងដល់ ១៧៤ នាក់ ជាចំនួនច្រើនជាងគេនៅក្រៅប្រទេស ចិនដីគោក។
មនុស្ស ៩៧ នាក់ផ្សេងទៀតបានស្លាប់នៅក្នុងប្រទេស ចិន ដោយនាំឲ្យស្លាប់នៅទូទាំងប្រទេសឡើងដល់ ១ ១១៣ នាក់ ខណៈមនុស្សជាង ៤ ៤៦០០ នាក់ បានឆ្លងវីរុសកូរ៉ូណា COVID-19 ប្រភេទថ្មីនេះ។
WHO បានសម្រេចចិត្តដាក់ឈ្មោះវីរុស COVID-19 ជាការបន្តអនុវត្តគោលការណ៍នានា មានបំណងដើម្បីបញ្ចៀសការធ្វើឲ្យជំងឺមួយទាក់ទងទៅនឹងសត្វ ឬទីតាំងភូមិសាស្ត្រណាមួយនោះ។
ដោយថ្លែងទៅកាន់ក្រុមអ្នកវិទ្យាសាស្ត្រនៅឯសន្និសីទអន្តរជាតិលើកដំបូងស្តីពីវីរុសនេះ នៅក្នុងក្រុងហ្សឺណែវកាលពីថ្ងៃអង្គារ ប្រធានអង្គការ WHO លោកតេដ្រូស អាដហាណុម ហ្គេប្រ៊ីយេស៊ុស បានព្រមានថា វីរុសនេះពិតជា «គំរាមកំហែងយ៉ាងធ្ងន់ធ្ងរ»។
ប៉ុន្តែលោកបានថ្លែងថា មានឱកាសខិតខំប្រឹងប្រែង និងរួបរួមគ្នាគ្រប់មជ្ឈដ្ឋាន ដើម្បីប្រយុទ្ធប្រឆាំងវីរុសនេះ។
លោក តេដ្រូស បានថ្លែងថា៖ «យើងមិនអាចការពារខ្លួនបានទេ ដោយបន្ថែមថា «ប្រសិនបើយើងវិនិយោគនាពេលឥឡូវនេះ... យើងមានឱកាសពិតប្រាកដក្នុងការបញ្ឈប់ការរាលដាលនៃវីរុសនេះ»។
ក្រោយមក លោកបានថ្លែងប្រាប់ក្រុមអ្នកកាសែតនៅក្រៅសង្វៀនជំនួបដែលបានបន្តរហូតដល់ថ្ងៃពុធថា៖ «វីរុសជាច្រើន អាចមានផលវិបាកធ្ងន់ធ្ងរជាងអំពើភេរវកម្ម»។
អាជ្ញាធរចិនបានរាំងខ្ទប់មនុស្សរាប់លាននៅក្នុងខេត្តហឺប៊ីភាគកណ្តាល ខណៈវីរុសនេះ បានផ្ទុះឡើង និងរឹតបន្តឹងការដើរហើរនៅក្នុងក្រុងដទៃទៀតនៅក្នុងផ្នែកជាច្រើនទៀតនៃប្រទេសនេះ ជាកិច្ចប្រឹងប្រែងមួយមិនធ្លាប់មានពីមុន ដើម្បីទប់ស្កាត់មិនឲ្យមេរោគនេះ រាលដាលតទៅទៀត។
ប្រទេសជាច្រើនបានចេញបម្រាមឲ្យមនុស្សមកពីប្រទេស ចិន ឲ្យចូលខណៈដែលក្រុមអាកាសចរណ៍ធំៗជាច្រើនបានផ្អាកជើងហោះហើរទៅ និងមកពីប្រទេសនោះ ដោយសារមនុស្សរាប់រយនាក់បានឆ្លងនៅក្នុងប្រទេសចំនួន ២៤។
ភាគច្រើនក្នុងចំណោមអ្នកស្លាប់នៅក្នុងខេត្តហឺប៊ី និងក្រុងវូហានដែលជាទីវីរុសនេះបានផ្ទុះឡើង។ ប៉ុន្តែជាការរីកចម្រើនវិជ្ជមាន ដោយករណីឆ្លងថ្មីបានថយចុះនៅក្នុងខេត្តហឺប៊ីក្នុងរយៈពេល ២ ថ្ងៃជាប់គ្នា៕ AFP/PSA