ក្រុងបាងកកៈ ក្រុមមន្ត្រីកងទ័ពជើងទឹកថៃ បានថ្លែងកាលពីថ្ងៃពុធថា ជនភៀសខ្លួនមូស្លីមរ៉ូហ៊ីងយ៉ា ៦៥ នាក់ ត្រូវបានគេប្រទះឃើញនៅលើទូកបាក់បែកមួយនៅឆ្នេរសមុទ្រថៃភាគខាងត្បូង ខណៈដែលក្រុមអាជ្ញាធរ បានស៊ើបអង្កេតថា តើពួកគេត្រូវបានគេជួញដូរឬយ៉ាងណានោះ?
ទូកនោះ ត្រូវបានគេរកឃើញកាលពីព្រឹកថ្ងៃអង្គារ នៅក្នុងតំបន់ឆ្នេរសមុទ្រ Tarutao Marine National Park នៅប្រទេស ថៃ ភាគខាងត្បូង មានចម្ងាយប្រហែល ៤០០ គីឡូម៉ែត្រពីព្រំដែនមីយ៉ាន់ម៉ា។
ជនរ៉ូហ៊ីងយ៉ាប្រហែល ៧៤ ម៉ឺននាក់ បានរត់ភៀសខ្លួនចេញពីមីយ៉ាន់ម៉ា ចាប់តាំងពីមានការបង្ក្រាបដោយយោធាយ៉ាងឃោរឃៅកាលពីឆ្នាំ ២០១៧ ប្រឆាំងជនភាគតិចគ្មានសញ្ជាតិនៅក្នុងប្រទេសភាគច្រើនកាន់ព្រះពុទ្ធសាសនា។
ពួកគេភាគច្រើន បានរត់គេចខ្លួនចូលទៅក្នុងជំរំជនភៀសខ្លួននៅប្រទេស បង់ក្លាដែស ចំណែកឯអ្នកផ្សេងៗទៀត បានធ្លាក់ចូលទៅក្នុងដៃក្រុមឈ្មួញជួញដូរមនុស្សខុសច្បាប់ ខណៈដែលពួកគេបានស្វែងរកជីវភាពរស់នៅឲ្យបានល្អប្រសើរជាងមុននៅប្រទេស ម៉ាឡេស៊ី និងថៃ។
អ្នកនាំពាក្យកងទ័ពជើងទឹកថៃបានថ្លែងថា មានស្ត្រី ៣១ នាក់ និងក្មេង ៥ នាក់ នៅក្នុងចំណោមជនរ៉ូហ៊ីងយ៉ានៅលើទូកបាក់បែកនោះ។
បុរសជនជាតិថៃម្នាក់ និងពលរដ្ឋមីយ៉ាន់ម៉ា ៥ នាក់ នៅក្នុងក្រុមអ្នកទាំងនោះផងដែរ។ បុរសទាំងនោះបាននិយាយថា ពួកគេកំពុងស្ទូចត្រីក្នុងតំបន់ ហើយមិនជាប់ពាក់ព័ន្ធជាមួយជនរ៉ូហ៊ីងយ៉ាទេ៕ AFP/SK