.jpg)
នាវាចម្បាំងរបស់កងកម្លាំងស្វ័យការពារដែនសមុទ្រជប៉ុន។ AFP
ក្រុងតូក្យូៈ សារព័ត៌មានក្នុងស្រុក បានឲ្យដឹងកាលពីថ្ងៃចន្ទថា ប្រទេសជប៉ុនបានចាប់ផ្តើមលំហាត់សឹកដោយប្រើនាវាមុជទឹកជាលើកទី ១ នៅក្នុងសមុទ្រចិនខាងត្បូង ដែលជាជំហានមួយដែលអាចបង្កឲ្យប្រទេសចិនខឹងសម្បាដោយសារតែក្រុងប៉េកាំងបានទាមទារស្ទើរតែទាំងអស់នៃដែនទឹកមានជម្លោះនោះ។
ក្រសួងការពារជាតិបានថ្លែងនៅក្នុងសេចក្ដីថ្លែងការណ៍ខ្លីមួយថា លំហាត់សឹកប្រឆាំងនឹងនាវាមុជទឹកត្រូវបានប្រព្រឹត្តទៅនៅថ្ងៃព្រហស្បតិ៍នៅដែនសមុទ្រចិនខាងត្បូងដើម្បី «ពង្រឹងក្បួនយុទ្ធសាស្ត្រ»។
នៅថ្ងៃដដែលនេះដែរ សារព័ត៌មានបានថ្លែងថា នាវាមុជទឹកឈ្មោះ Asahi Shimbun ក៏បានចូលរួមជាមួយនឹងនាវាចម្បាំងជប៉ុន ៣ ផ្សេងទៀតនៅក្នុងលំហាត់សឹកដែលប្រព្រឹត្តទៅនៅភាគនិរតីនៃកោះ Scarborough Shoal ដែលគ្រប់គ្រងដោយចិន។
ប្រទេសចិនបានទាមទារ យកស្ទើរតែទាំងអស់នៃសមុទ្រចិនខាងត្បូងដែលសម្បូរទៅដោយភោគផល និងធនធានមួយនេះ ទោះបីជាមានការតវ៉ាទាមទារពីសំណាក់ប្រទេសប្រ៊ុយណេ ម៉ាឡេស៊ី ហ្វីលីពីន តៃវ៉ាន់ និងវៀតណាម ហើយដែនទឹកនេះ គឺជាផ្លូវនាវាចរណ៍យ៉ាងសំខាន់ ដែលរកបានចំណូលពីកប៉ាល់ដឹកទំនិញប្រហែលជា ៥ ពាន់ពាន់លានដុល្លាររៀងរាល់ឆ្នាំ៕
