ក្រុងតេអេរ៉ង់ៈ ប្រធានាធិបតីអ៊ីរ៉ង់ រុស្ស៊ី និងតួកគី ជួបគ្នានៅក្រុងតេអេរ៉ង់ នៅថ្ងៃសុក្រ ដើម្បីបើកជំនួបមួយដែលត្រូវបានគេរំពឹងទុកថានឹងរៀបចំជោគវាសនារបស់ខេត្តអ៊ីដលីបដែលជាមូលដ្ឋានធំរបស់ក្រុមឧទ្ទាមនៅក្នុងប្រទេសស៊ីរី។
ជំនួបនោះកើតឡើង ខណៈកងកម្លាំងស៊ីរី ទំនងនឹងចាប់ផ្តើមធ្វើការវាយប្រហារទ្រង់ទ្រាយធំមួយ ដែល នាំឲ្យមានការព្រួយបារម្ភអំពីមហន្តរាយមនុស្សធម៌ក្នុងទំហំមួយ ដែលមិនទាន់ត្រូវបានឃើញនៅក្នុងជម្លោះរយៈពេល ៧ ឆ្នាំនោះ។
ក្រុងដាម៉ាស និងអ្នកគាំទ្រសំខាន់របស់ខ្លួន គឺក្រុងម៉ូស្គូបានធ្វើការលុបបំបាត់ក្រុមជីហាដនិយម ដែលគ្រប់គ្រងខេត្តអ៊ីដលីបនេះ ប៉ុន្តែលទ្ធផលនៃជំនួបនៅថ្ងៃសុក្រនោះ អាចធ្វើឲ្យ ប៉ះពាល់ដល់ទំហំ និងការកំណត់ ពេលវេលានៃការវាយប្រហារមួយ។
អ្នកនាំពាក្យរបស់ប្រធានាធិបតីលោកវ្ល៉ាឌីមៀរ ពូទីន គឺលោក Dmitry Peskov បានថ្លែងកាលពីថ្ងៃអង្គារថា៖ «យើងដឹងថា កងកម្លាំងប្រដាប់អាវុធស៊ីរី កំពុងត្រៀមដោះស្រាយបញ្ហានេះ»។
ដោយត្រូវដណ្តើមបានពីកងកម្លាំងរបស់រដ្ឋាភិបាលនៅក្នុងឆ្នាំ ២០១៥ ខេត្តអ៊ីដលីប និងតំបន់ជាច្រើនដែលនៅជាប់នោះ បង្កើតដែនដីស៊ីរីមួយយ៉ាងធំនៅក្នុងកណ្តាប់ដៃរបស់ក្រុមឧទ្ទាមនៅឡើយ។
តួកគី បានប្តេជ្ញាបណ្តេញក្រុមជីហាដនិយម ដែលគ្រប់គ្រងខេត្តអ៊ីដលីបប្រមាណ ៦០ ភាគរយ ប៉ុន្តែខ្លួនបានគាំទ្រក្រុមឧទ្ទាមនៅទីនោះនិងទីតាំងសង្កេតចំនួន ១៥ របស់យោធានៅទូទាំងខេត្តនេះ។
រុស្ស៊ី តួកគី និងអ៊ីរ៉ង់ គឺជាអ្នកធានាឲ្យមានដំណើរការចរចាក្រុងអាស្តាណា ជាផ្លូវនៃការចរចា ដែលបានគ្របដណ្តប់ដំណើរការចរចាក្រុងហ្សឺណែវ និងការពិតជួយប្រធានាធិបតីស៊ីរីលោកបាសារ អាល់អាសាដ រក្សាអំណាចរបស់លោកជាថ្មីក្នុងការដឹកនាំប្រទេសនេះ។
ស្របពេលជាមួយនឹងការបង្កើនកម្លាំងយោធារបស់រដ្ឋាភិបាលស៊ីរីនេះប៉ុន្មានសប្តាហ៍នេះ ត្រូវមើលឃើញថាសកម្មភាពយោធាមានភាពតានតឹងយ៉ាងខ្លាំង។ ការសែត Al-Watan បានសរសេរកាលពីថ្ងៃអង្គារថា លទ្ធផលនៃការចរចា នឹងត្រូវបង្ហាញនៅក្នុងក្រុងតេអេរ៉ង់៕