.jpg)
យុទ្ធជនឧទ្ទាមស៊ីរីម្នាក់សម្រាកនៅទីតាំងមួយនៅក្នុងខេត្តអុីដលីប។ AFP
ក្រុងអង់ការ៉ាៈ កាលពីថ្ងៃពុធតួកគី បាននិយាយថា ការវាយប្រហារផ្លូវអាកាសរបស់រុស្ស៊ីទៅលើខេត្តអ៊ីដលីបកាន់កាប់ដោយក្រុមឧទ្ទាមនៅស៊ីរី ខុសទាំងស្រុង និងថា ក្រុងអង់ការ៉ាប្រឹងប្រែងបញ្ឈប់ការវាយប្រហារលើខេត្តនេះ។
កងទ័ពរបបស៊ីរី បានប្រមូល-ផ្តុំគ្នានៅជាយខេត្តនេះ ជាច្រើនសប្តាហ៍ ដែលខេត្តនេះមានព្រំដែនជាមួយតួកគី ដោយបង្កើតឲ្យមានមហន្តរាយមនុស្សធម៌មួយទៀតនៅក្នុងជម្លោះរយៈពេល ៧ ឆ្នាំនៅស៊ីរីនេះ។
ក្រុមឃ្លាំមើលសិទ្ធិមនុស្សស៊ីរីមានមូលដ្ឋាននៅអង់គ្លេសបានឲ្យដឹងកាលពីថ្ងៃអង្គារថា ជនស៊ីវិលយ៉ាងតិច ៩ នាក់ បានស្លាប់នៅក្នុងការវាយប្រហាររបស់រុស្ស៊ីកាលពីថ្ងៃអង្គារ។ ប៉ុន្តែក្រុងម៉ូស្គូ បាននិយាយកាលពីថ្ងៃពុធថា ការវាយប្រហារនោះ បានយកក្រុមភេរវករ Al-Nusra Front ជាគោលដៅ។
រដ្ឋមន្ត្រីការបរទេសតួកគីលោក Mevlut Cavusoglu បានថ្លែងនៅក្នុងអំឡុងសន្និសីទកាសែតជាមួយសមភាគីអាល្លឺម៉ង់លោក Heiko Maas ថា ក្រុងអង់ការ៉ាចង់ទប់ស្កាត់មិនឲ្យមានការវាយប្រហារទៅលើខេត្តអ៊ីដលីបបន្ថែមទៀត។
លោក Cavusoglu បានថ្លែងថា ក្រោយការវាយប្រហារនោះ មានការចរចារវាងស្ថាប័នពាក់ព័ន្ធរបស់យើង។ ខេត្តអ៊ីដលីប គឺជាតំបន់មួយនៃអ្វីដែលគេហៅថា តំបន់គ្មានភាពតានតឹង ដែលត្រូវបានបង្កើតឡើងដោយសារលទ្ធផលនៃការចរចារបស់រុស្ស៊ី តួកគី និងអ៊ីរ៉ង់កាលពីឆ្នាំទៅខណៈក្រុងដាម៉ាសនៅតែគ្រប់គ្រងប្រទេសភាគច្រើននោះ។
លោក Cavusoglu បានថ្លែងថា ពីមួយថ្ងៃទៅមួយថ្ងៃយើងខិតខំប្រឹងប្រែងធ្វើការ ដើម្បីទប់ស្កាត់មិនឲ្យមានការវាយប្រហារទៅលើខេត្តអ៊ីដលីបថែមទៀតទេ៕
