ក្រុងការ៉ាកាសៈ ក្រុមតំណាងរបស់ប្រធានាធិបតីវ៉េណេស៊ុយអេឡា លោក នីកូឡាស ម៉ាឌូរ៉ូ និងមេបក្សប្រឆាំងលោក Juan Guaido បានទៅដល់កោះបាបាដុស ដើម្បីបន្តកិច្ចពិភាក្សាដោះស្រាយវិបត្តិនយោបាយរបស់ប្រទេសនេះ។
កាលពីសប្តាហ៍មុនគូប្រឆាំងបដិបក្ខ បានឯកភាពគ្នាបង្កើតវេទិកាមួយដើម្បីបន្តការចរចា ដែលបានសម្រុះសម្រួលដោយប្រទេស ន័រវែស ក្រោយពីមានកិច្ចពិភាក្សា ៣ ថ្ងៃ នៅកោះការ៉ាបៀននោះ។
រដ្ឋមន្ត្រីទំនាក់ទំនងរបស់រដ្ឋាភិបាលលោក Jorge Rodriguez ដែលត្រូវបានអមដំណើរដោយរដ្ឋមន្ត្រីការបរទេសលោក Jorge Arreaza នៅកោះបាបាដុស បានថ្លែងនៅក្នុងឃ្លីបវីដេអូមួយ ដែលបានផ្សព្វផ្សាយកាលពីថ្ងៃចន្ទថា៖ «យើងកំពុងបន្តដំណើរដ៏សំខាន់ជាមួយលោកប្រធានាធិបតីនី កូឡាស ម៉ាឌូរ៉ូ ជាកិច្ចពិភាក្សាសន្តិភាពជាអចិន្រៃ្តយ៍មួយ ដើម្បីដោះស្រាយភាពចម្រូងចម្រាសនយោបាយឲ្យស្របទៅតាមរដ្ឋធម្មនុញ្ញ និងប្រជាធិបតេយ្យ។
តំណាងប្រេសិតពិសេសរបស់លោក Guaido បានទៅដល់កោះបាបាដុសកាលពីថ្ងៃអាទិត្យ។
ការិយាល័យសារព័ត៌មានរបស់លោកបានថ្លែងនៅក្នុងគេហទំព័រធ្វីធើរថា ពួកគេកំពុងមានបំណងចង់ «ផ្លាស់ប្តូរ ដែលអាចបញ្ចប់ការឈឺចាប់របស់ប្រជាជនវ៉េណេស៊ុយអេឡា»។
បន្ទាប់ពីកិច្ចពិភាក្សាកាលពីសប្តាហ៍មុន ប្រទេស ន័រវែស បានប្រកាសថា ភាគីទាំង ២ បានឯកភាពគ្នាដើម្បី «ធ្វើការនៅក្នុងការបន្តចរចា និងឥរិយាបថសមត្ថភាព ដើម្បីឈានទៅរកដំណោះស្រាយ ដែលបានឯកភាពគ្នានៅក្នុងការគាំទ្រច្បាប់រដ្ឋធម្មនុញ្ញ»។
កិច្ចពិភាក្សានៅកោះបាបាដុស ត្រូវបានបន្តចរចានៅជុំទី១ នៅក្នុងទីក្រុងអូសាកា កាលពីខែឧសភា។
ប្រទេស វ៉េណេស៊ុយអេឡា បានជាប់ផុងធ្លាក់ចូលទៅក្នុងវិបត្តិជាប់គាំងនយោបាយយ៉ាងធ្ងន់ធ្ងរ ចាប់តាំងពីខែមករានៅពេលលោក Guaido បានប្រកាសខ្លួនឯងថាជាប្រធានាធិបតីស្តីទី ហើយភ្លាមៗនោះទទួលបានការគាំទ្រពីបណ្តាប្រទេសជាង ៥០ ផងដែរ។
ប្រទេសក្រីក្រសម្បូរទៅដោយប្រេងមួយនេះ បានធ្លាក់ចូលទៅក្នុងវិបត្តិយ៉ាងជ្រៅអស់រយៈពេល ៥ ឆ្នាំ ខណៈមានកង្វះស្បៀងអាហារ និងថ្នាំពេទ្យជាញឹកញាប់ និងសេវាសាធារណៈកំពុងធ្លាក់ចុះខ្សោយជាបន្តបន្ទាប់នោះ។
យោងតាម UN បានឲ្យដឹងថា ប្រជាជនវ៉េណេស៊ុយអេឡាប្រហែល ៣០ លាននាក់ ក្នុងនោះចំនួន ១ ភាគ ៤ ត្រូវការជំនួយជាចាំបាច់៕ AFP/SK