ក្រុងវ៉ាស៊ីនតោនៈ ប្រធានាធិបតីអាមេរិកលោក ដូណាល់ត្រាំ បានថ្លែងកាលពីថ្ងៃសុក្រថា លោក និងមេដឹកនាំកូរ៉េខាងជើង គីម ជុងអ៊ុន ដូចជាចូលចិត្តគ្នាច្រើនខ្លាំង ហើយលោកបានអះអាងថាការប្រឈមមុខអាវុធនុយក្លេអ៊ែរជាមួយកូរ៉េខាងជើងក៏ត្រូវបាន «ដោះស្រាយច្រើនដែរហើយ»។
ដោយថ្លែងទៅកាន់ក្រុមអ្នកសារព័ត៌មាននៅខាងក្រៅសេតវិមានលោក ត្រាំ បានថ្លែងថាលោកបានឲ្យលេខទូរស័ព្ទផ្ទាល់ខ្លួនទៅលោក គីម ជុងអ៊ុន ហើយលោកបានបន្ថែមថា៖ «លោក គីម ជុងអ៊ុន អាចទូរស័ព្ទមកខ្ញុំ ប្រសិនបើគាត់មានភាពចំាបាច់ណាមួយនោះ»។
លោក ត្រាំ បានថ្លែងសង្កត់ធ្ងន់ថា៖ «ទំនាក់ទំនងរបស់យើងពិតជាមានសារៈសំខាន់ណាស់»។
នៅក្នុងសារវីដេអូដែលត្រូវបានផ្សព្វផ្សាយដោយសេតវិមានលោក ត្រាំ បានថ្លែងថាកិច្ចប្រជុំកាលថ្ងៃអង្គារជាមួយមេដឹកនាំវ័យក្មេងរបស់កូរ៉េខាងជើង គឺមានលក្ខណៈបើកចំហត្រង់ៗ និងពិតជាទទួលបានផ្លែផ្កាច្រើន។
លោកថ្លែងថា៖ «ប្រសិនបើមានឱកាសដែលជួយឲ្យមានសន្តិភាព ហើយប្រសិនបើមានឱកាសដើម្បីបិទបញ្ចប់ការគំរាមកំហែងនៃសង្គ្រាមនុយក្លេអ៊ែរ យើងត្រូវតែចាប់យកឱកាសនោះឲ្យបានទោះបីក្នុងតម្លៃណាក៏ដោយ»។
លទ្ធផលនៃកិច្ចប្រជុំនៅប្រទេសសិង្ហបុរីដែលលោក គីម ជុងអ៊ុន និងលោក ត្រាំ បានចុះហត្ថលេខាលើ «កិច្ចព្រមព្រៀងដើម្បីធ្វើការលុបបំបាត់អាវុធនុយក្លេអ៊ែរទាំងស្រុងនៅលើឧបទ្វីបកូរ៉េ» ទទួលបានការស្វាគមន៍លាយឡំជាមួយនឹងមន្ទិលសង្ស័យពីសំណាក់ក្រុមអ្នកវិភាគ។
លោក គីម ជុងអ៊ុន មិនបានចាត់វិធានការអ្វីជាដុំកំភួននៅឡើយទេ ក្នុងដំណើរការបោះបង់កម្មវិធីនុយក្លេអ៊ែររបស់លោកនោះ។
លោក ត្រាំ បានថ្លែងថារដ្ឋមន្ត្រីការបរទេសលោក Mike Pompeo «នឹងត្រូវធ្វើការផ្ទាល់ជាមួយកូរ៉េខាងជើង» នៅប៉ុន្មានសប្ដាហ៍ និងនៅក្នុងខែខាងមុខនេះ៕ PDN