ក្រុងវ៉ាស៊ីនតោន៖ ប្រធានាធិបតីអាមេរិកលោក ដូណាល់ ត្រាំ កាលពីថ្ងៃអង្គារបានគំរាមកាត់ជំនួយរបស់អាមេរិកពី អង្គការសុខភាពពិភពលោក (WHO) ដោយចោទប្រកាន់អង្គការនេះពីបទលម្អៀងទៅរកប្រទេស ចិន ជាទីដែលអាជ្ញាធរ បានដកបម្រាមធ្វើដំណើររយៈពេល ២ ខែកន្លះ នៅក្នុងក្រុងវូហាន ជាទីក្រុងដែលបានផ្ទុះការឆ្លងរីករាលដាលវីរុសផ្លូវដង្ហើមកូរ៉ូណាប្រភេទថ្មីជាសកល។
ខណៈអាមេរិកបានប៉ះពាល់ពីការកត់ត្រាសរុបចំនួនអ្នកស្លាប់ជិត ២ ០០០ នាក់ក្នុងរយៈពេល ២៤ ម៉ោង ប្រទេស ចិន បានរាយការណ៍ថា មិនមានអ្នកស្លាប់ថ្មីសម្រាប់លើកដំបូងនោះទេ ចាប់តាំងពី ការផ្ទុះវីរុសផ្លូវដង្ហើមកូរ៉ូណាប្រភេទថ្មីបានចាប់ផ្តើមនៅក្នុងក្រុងវូហានកាលពីចុងខែធ្នូ ឆ្នាំ ២០១៩។
ចំណែកនាយករដ្ឋមន្ត្រីប្រទេស អង់គ្លេស លោក បូរីស ចនសុន បានស្ថិតនៅក្នុងស្ថានការណ៍សុខភាពល្អប្រសើរ នៅក្នុងមន្ទីរពេទ្យមួយនៅក្នុងក្រុងឡុងដ៍ ក្រោយពីត្រូវបញ្ជូនទៅកាលពីថ្ងៃចន្ទរយៈពេល ១០ ថ្ងៃ ក្រោយពីត្រូវបានធ្វើរោគវិនិច្ឆ័យ ថាបានឆ្លងវីរុសផ្លូវដង្ហើមកូរ៉ូណានេះ។
អ្នកនាំពាក្យរបស់លោក បូរីស ចនសុន បានថ្លែងថា មេដឹកនាំអភិរក្សនិយមមានវ័យ ៥៥ ឆ្នាំ គឺ«មានសុខភាពល្អប្រសើរធម្មតា» បានកំពុង«ទទួលការព្យាបាលដាក់អុកស៊ីហ្ស៊ែនទៅតាមស្តង់ដា» ហើយមិនត្រូវការឧបករណ៍សម្រាប់ជួយការដកដង្ហើមទេ។
ការសម្រាកព្យាបាលនៅមន្ទីរពេទ្យរបស់មេដឹកនាំពិភពលោកដ៏ល្បីឈ្មោះនេះ បានបង្ហាញឲ្យឃើញការរាលដាលនៃជំងឺកូវីដ ១៩ ជាសកល ដែលបានដាក់មនុស្សជាង ៤ ពាន់លាននាក់ គឺជាងពាក់កណ្តាលពិភពលោកឲ្យស្នាក់នៅក្នុងផ្ទះ និងធ្វើឲ្យប៉ះពាល់សេដ្ឋកិច្ចទូទាំងពិភពលោក៕ AFP/SK