.jpg)
ប្រធានាធិបតីអាមេរិកលោក ដូណាល់ ត្រាំ (ឆ្វេង) និងប្រធានាធិបតីរុស្ស៊ី លោក វ្ល៉ាឌីមៀរ ពូទីន។ AFP
ក្រុងឡុងដ៍ៈ ប្រធានាធិបតីអាមេរិកលោកដូណាល់ ត្រាំ បំពេញទស្សនកិច្ចទៅកាន់ទ្វីបអឺរ៉ុប ដោយផ្តោតទៅលើបញ្ហាសំខាន់ៗជាច្រើន ខណៈលោកកំពុងរៀបចំខ្លួនដើម្បីជួបមេដឹកនាំរុស្ស៊ីលោកវ្ល៉ាឌីមៀរ ពូទីន នៅក្រុង Helsinki នៅថ្ងៃចន្ទនេះ។
លោកត្រាំ បានចាប់ផ្ដើមទស្សនកិច្ចរបស់លោកកាលពីថ្ងៃពុធ ដោយបានរិះគន់អាល្លឺម៉ង់លើការបេ្ដជ្ញាចិត្តក្នុងការចំណាយទៅលើអង្គការ NATO ខណៈអាល្លឺម៉ង់ នឹងបង្កើនការពឹងផ្អែកលើការនាំចូលឧស្ម័នពីប្រទេសរុស្ស៊ី។
លោកថ្លែងថា ក្រុងប៊ែរឡាំងបានចំណាយលុយរាប់ពាន់លានដុល្លារ ខណៈអាមេរិក ត្រូវចំណាយលុយរាប់ពាន់លានដុល្លារ ដើម្បីជួយការពារអាល្លឺម៉ង់ពីរុស្ស៊ី។
លោកបានថ្លែងដោយផ្តោតទៅលើសំណើគម្រោងបំពង់នាំឧស្ម័ន Nord Stream II ថា៖ «អាល្លឺម៉ង់ គឺជាចំណាប់ខ្មាំងរបស់រុស្ស៊ី ដោយសារអាល្លឺម៉ង់គ្រោង នឹងទិញឧស្ម័នដ៏ច្រើនសន្ធឹកសន្ធាប់ពីរុស្ស៊ីបន្ថែមទៀត»។
បន្ទាប់ពីបានជួបប្រាស្រ័យទាក់ទងជាមួយអធិការបតីលោកស្រីអេនជេឡា មឺរកែល រួចមក លោកត្រាំ បានផ្លាស់ប្ដូរឥរិយាបថរបស់លោក ហើយបានធ្វើការអះអាងថា លោកពិតជាមានទំនាក់ទំនងល្អណាស់ជាមួយនឹងលោកស្រី អេនជេឡា មឺរកែល។
ប៉ុន្តែកាលពីថ្ងៃព្រហស្បតិ៍លោកត្រាំ បានសរសេរលើ គេហទំព័ធ្វីធើរថា ជំហររបស់អាល្លឺម៉ង់ពិតជា «មិនអាចទទួលយកបានទេ»។
កាលពីថ្ងៃសុក្រ លោកបានថ្លែងថា គម្រោងបំពង់នាំឧស្ម័នគឺជា «កំហុសមួយដ៏ធ្ងន់ធ្ងរ» ដែលនឹងអនុញ្ញាតឲ្យរុស្ស៊ីមានឥទ្ធិពលលើអាល្លឺម៉ង់។
កាលពីនៅក្នុងកិច្ចប្រជុំអង្គការ NATO ក្នុងក្រុងប្រ៊ុចសែល លោកត្រាំ បានរិះគន់ក្រុម សម្ព័ន្ធមិត្តចំពោះការបរាជ័យនៃការប្ដេជ្ញាចិត្តលើការចំណាយក្នុងវិស័យការពារជាតិរបស់ពួកគេ ដោយលោកត្រាំបានទាមទារឲ្យពួកគេដំឡើងការចំណាយឲ្យបាន ២% នៃផលិតផលក្នុងស្រុកសរុប របស់ពួកគេ៕
